LeBron gisugat og pilde sa iyang  pagbalik; Cavs abante sa playoffs

CEBU, Philippines — Kapildihan maoy misugat ni NBA superstar LeBron James sa iyang pagbalik human makapalta og 13 ka duwa tungod sa injury didto pa gyud sa ilang korte.

Kini human ang Los Angeles Lakers gisungag sa Chicago Bulls, 118-108, sa ilang duwa kagahapon didto sa Crypto.com Arena sa LA, California.

Si James miduwa nga dili starter sa ikaduha pa lamang nga higayon sa iyang karera. Ang una nahitabo niadto pang Disiembre 2007 sa dihang sakop pa siya sa Cleveland Cavaliers.

Ang bagang panon sa ilang fans mihatag ni James og standing ovation sa dihang gipasud na siya ni coach Drvin Ham sa unang kuwarter diin ang Lakers naglabaw og tres puntos, 12-9.

Si James maoy nangu sa Lakers uban ang 19 puntos sud lamang sa 27 minutos.

Sila si Troy Brown ug Malik Beasley midugang og 18 puntos matag usa samtang si Anthony Davis mi-iskor og 15 alang sa Lakers nga gawas nga naputol ang tulo ka sagunson nga daog, natagak sab sab sa ikasiyam nga dapit sa Western Conference.

Samtang ang Bulls mipahayag sa ilang tsansa nga makaapil sa play-in tournament sa East.

Salamat sa eksplosibong salida ni Zach LaVine nga mipatuasik og 32 puntos ingon man ni DeMar De Rozan nga mitali og 17 puntos ug 10 ka assists alang sa Bulls.

Sa laing bahin, ang Cleveland Cavaliers miangkon og luna sa playoffs sa labing unang higayon sukad niadtong 2018 human giugbok ang Houton Rockets, 108-91.

Si Jarret Allen mihipos og 24 puntos, 14 ka rebounds ug tulo ka blocks samtang si Donovan Mitchell midonar og 22 puntos alang sa Cavs nga segurado nang makasud sa top 6 sa East nga naghatag kanila og awtomatik nga puwesto sa post-season.

Sa laing bahin, si Jaylen Brown mipabuto og 41 puntos ug 13 ka rebounds aron pangulohan ang Boston Celtics ngadto sa 137-93 nga palampaso sa San Antonio Spurs.

Misidlak sab si Ja Morant nga mikadlit og 27 puntos sa dihang gibalian og pako sa Memphis Grizzlies ang Atlanta Hawks, 123-119, alang sa ikaunom nilang sagunson nga daog.

Samtang ang Dallas Mavericks padayon nga misukarap human giparotan sa Charlotte Hornets, 110-104. Natiwasan pa ang Mavs gumikan kay si Luka Doncic natawgan sa ika-16 niyang technical foul ning season nga nagpasabot og awtomatik nga usa ka duwa na suspensiyon.

Sa katapusang duwa, ang Minnesota Timberwolves mipayaka sa Golden State Warriors 99-96, luyo sa krusyal nga tres ni Karl-Anthony Towns.