JKV, Project Hoops wa gihapo'y pilde
CEBU, Philippines — Wa gihapo'y nakapugong sa mainit nga ratsada sa JKV Enterprises ug Project Hoops sa Hoop Nation Developmental League (HNDL)-Sunday Night Hoops Season 2 nga gipaluyohan sa Sunsport didto sa City Sports Club-Cebu gym.
Si Daryl Ebale mikolekta og 25 puntos, tulo ka rebounds, ug five assists sa dihang gilampornas sa JKV ang Brazzers, 78-58, aron inaton ang perpekto nilang sinugdanan ngadto sa 8-0, samtang si Philmer Seno mitali og 27 puntos, pito ka rebounds ug duha ka assists sa dihang gi-ihaw sa Project Hoops ang Pirates, 70-57, alang sa ikaunom nilang sagunson nga daog.
Sa laing bahin, si Jacob Gaviola mihipos og 17 puntos, pito ka rebounds ug upat ka assists sa dihang giinat sa CEPBA ang ilang rekord ngadto sa 6-1 luyo sa 81-47 nga demolisyon sa Milestone, samtang si Raymond Flores mitimbre of 17 puntos, 10 ka rebounds ug tulo ka assists sa dihang gitumba sa Rustan's ang Seda-ACC, 59-52, alang sa ikaupat nilang daog sa unom ka duwa.
Sa ubang mga resulta, si Lemuel Gonzaga mitagak og 23 puntos, pito ka rebounds ug tulo ka assists aron ituboy ang Lenovo SM City ngadto sa 69-58 nga pagpakaging sa Central Blockers, si Jason Lazaro mikimada og 23 puntos, pito ka rebounds ug duha ka assists sa dihang ang Benchwarmer nakaipsot sa Rescue Fone, 53-52, samtang si Bob Lapuz mitali og 12 puntos, walo ka rebounds, tulo ka assists ug duha ka steals aron pangulohan ang Spit On Them ngadto sa 64-44 nga pagkastigo sa Unknown.
Ang Lenovo, Benchwarmer, ug Spit On Them nagkupot na karon og parehong 4-3 nga baraha.
Samtang si Ivan Deo miharos og 28 puntos, pito ka rebounds, ug duha ka assists sa dihang gipayaka sa TUF ang Hoopers, 68-53, aron tablahon ang ilang marka ngadto sa 3-3.
- Latest
