CRMC roosevelts bunyagan og kayo

Makigharong batok sa USC Warriors sa Dodong Junie Basketball Invitational

CEBU, Philippines — Usa ka kulbahinam ug makalingaw nga aksiyon sud sa korte ang mahitabo na sab sa dakbayan sa Bogo, amihanang bahin sa Sugbo diin mga teams gikan sa CESAFI, NCAA, ug UAAP ang magbangga sa Dodong Junie Basketball Invitational karong Pebrero 26 didto sa Don Celestino Martinez Sports and Cultural Center.

Sa pasiunang aksiyon sa alas-4 sa hapon, ang City of Bogo Science and Arts Academy  (CBSAA) Trailblazers makigpinaksitay sa University of the Visayas (UV) Baby Lancers.

Ang Trailblazers ni coach Leode Garcia mihimo og kasaysayan sa miaging CESAFI season isip labing unang guest team nga miharos og daog sa tanang duwa nila sa eliminasyon. Mitapos hinoon silang first runner-up human gi-sweep sa Sacred Heart School-Ateneo de Cebu (AdC) Magis Eagles sa ilang best-of-three finals.

Human sa sangka sa CBSAA ug UV, ang Cebu Roosevelt Memorial Colleges (CRMC), ubos sa pagtimon ni coach Paul Alelu Flores nga migiya sa Consolacion Sarok Weavers ngadto sa makasaysayanong kampiyonato sud sa duha ka sunod-sunod nga higayon sa Pilipinas Super League (PSL), bunyagan og kayo sa dihang ilang hamagon ang University of San Carlos (USC) Warriors sa alas 5:30 sa hapon.

Ang duwa mahinungdanon alang sa Roosevelts, nga kasamtangang nangandam sa ila unyang pagwadwad isip guest team sa 2023 CESAFI season.

"We are happy to play against one of the big schools in Cebu who is also a part of the CESAFI.This will be a big test for our team and a barometer on what we need to improve on as part of our preparation for the next CESAFI season," matud pa ni Marc Malazarte, ang team manager sa CRMC ug CBSAA.

Ang Roosevelts mipaslak sa lima ka Sarok Weavers nga sila si Paulo Dalumpines, Keaton Taburnal, Wes Malazarte, Kin Dayday, ug Serg Alburo sa ilang lineup.

Anaa sab sa ilang poder sila si CESAFI Juniors Mythical Five members Dale Otero ug Jerome Arboiz sa  CBSAA ingon man sila si James Gelig, Jray Casinillo, ug Redjee Recimiento sa Bogo City Bugoys sa PSL.

"I expect our boys to give their best shot since we will be playing in our hometown and in front of our bosses sir Victor Elliot Lepiten and sir Junie Martinez, who just celebrated his birthday. A win will also be a fitting gift for his all-out support to the team," dugang pa ni Malazarte.

Sa main game nga gikatakda sa alas-7 sa gabii, ang San Beda Red Lions sa NCAA makigharong sa National University (NU) Bulldogs sa UAAP.

Gipresenta sa kagamhanan sa siyudad sa Bogo ubos sa liderato ni mayor Carlo Martinez inabagan sa Cebu Landmasters, ang mga tickets sa maong pasundayag nagkantidad og P20 sa general admission, P50 sa lower box, ug P200 sa VIP section.