Jersey ni Kobe Bryant nahalin og $5.8 million
CEBU, Philippines — Nahalin ang usa ka jersey nga nasul-ot ni NBA legend Kobe Bryant sa kantidad nga $5.8 million atol sa auction nga gipasiugdahan sa Sotheby's didto sa New York kagahapong adlawa.
Mas mahal kini sa miaging jersey sa LA Lakers icon nga napalit sa presyo nga $3.7 million.
Ang No.24 nga uniporme ni Bryant gibaligya sa tag-iya niini nga wala magpaila.
Gisul-ot kini ni Bryant sud sa 25 ka mga duwa uban sa Lakers niadtong NBA 2007-2008 season diin siya gibayaw nga MVP sa labing una ug bugtong nga higayon sa iyang karera.
Sa dihang unang gi-auction ang maong jersey niadtong 2013, mibalor lamang kini og $18,678.
Atol sa mabulokon niyang panahon sa Lakers nga milanat og duha ka dekada, si Bryant nakasakmit og lima ka kampiyonato sa NBA. Nakadaog sab siya og duha ka Olympic gold medals isip sakop sa Team USA. Si Bryant namatay sa usa ka helicopter crash tulo ka tuig na ang milabay.
- Latest
