BSA NY teams misidlak sa BBallshootout AAU Winter Classic

CEBU, Philippines — Ang mga pambato sa Basketball Sports Alliance (BSA) New York misidlak sa BBallshootout Amateur Athletic Union (AAU) Youth Winter Classic Tournament ning bag-ohay pa lamang didto sa Newark Academy sa Livingston, New Jersey.

Ang BBallshootout maoy nagpadagan sa labing dako ug labing nindot nga mga torneyo sa basketbol didto sa New Jersey.

Gipahimuslan og maayo sa mga BSA NY teams ang kahigayonan human sila nakalahutay sa qualifying rounds ug mi-abante sa kampiyonato sa tagsa-tagsa nila ka mga age groups.

Sa katapusan, ang BSA NY gikoronahang kampiyon sa 14 Under category. Ila kining gipalamanan og duha ka first runner-up nga tropeyo sa 10 Under ug 13 Under divisions.

Migiya sa mga batan-ong magduduwa sa BSA NY ngadto sa nakab-ot nilang dungog mao sila si coach Elmer Remon, Victor Villegas, ug Dr. Michael Kerin kauban ang mga Sugbuanong coach nga sila si Ruel Gomez, Bembem Alcaraz, ug Eugene Tampus.

Si Remon, ang coach sa 10 Under, maoy pangu sa kinatibuk-ang BSA NY sports program samtang si Dr. Kerin, nga nagdala sa 15 Under girls squad, maoy kasamtangang presidente sa BSA New York.

Usa ka organisasyon nga gitukod nilang Remon ug Villegas niadtong 2012, ang BSA New York nagtinguha nga tudloan ug barion ang abilidad sa mga batan-ong Fil-Am ballers nga namgambisyon maapil sa varsity teams sa ilang mga tunghaan ug ingon man andamon sila sa nagkadaiyang mga kompetisyon sa umaabot.