Tay Tung 3-0 na sa SM-NBTC Visayas qualifying

CEBU, Philippines — Human gidemolis ang Hardwork Baller-Crusader sa Bohol ug OCCCI-Western Leyte College (WLC) sa Ormoc, padayong nanginit ang Bacolod Tay Tung High School aron tumbahon ang Bentranco Bengals Bohol, 83-65, alang sa ikatulo nilang sagunson nga daog sa SM-NBTC Visayas Qualifying Tournament kagahapon didto sa Cebu City Sports Institute sa Barangay Sawang Calero.

Ang Tay Tung na-alkansi og sayes puntos sa sayong bahin sa ikatulong kuwarter, 35-41, apan milusad og nagbagang resbak, 26-11, aron ilogon ang labaw sa hingpit, 61-52.

Misamot pa ang kainit sa Tay Tung sa naghinapos nga bahin sa duwa aron ilubong ang Bentranco og 18 puntos.

Si Nap Lawrence Aleligay maoy nangu sa Tay Tung uban ang 25 puntos. Si Joevan Felicidario midugang og 17 puntos, upat ka rebounds, duha ka assists ug walo ka steals samtang si Shannon Gray Sealey miamot og otso puntos, 13 ka rebounds ug upat ka assists.

Sa laing bahin, ang Sacred Heart School-Ateneo de Cebu (SHS-AdC) Team B ug ang Black Shama Consolacion mikadlit sa una nilang daog human pareho nilang gipayaka ang Hardwork Baller-Crusader.

Ang Ateneo de Cebu maoy unang mipaksit sa Hardwork Baller, 55-49, niadtong Huybes sa hapon.

Si Sean Gabriel Uribe mihipos og 14 puntos ug pito ka rebounds samtang si Ellieken Lim midonar og 10 puntos sa Ateneo Hearters.

Kahapon, ang Black Shama na maoy mi-ihaw sa Hardwork Baller, 94-51 .

Si John Carlo Sabroso ang bida sa Black Shama bitbit ang 19 puntos, duha ka rebounds, ug upat ka assists. Nakakuha siya og igong suporta gikan nilang Nel Castro ug Keanu Bryle Rubio nga nagkumboya'g 27 puntos.