Sixers gipaksit ang Nets

CEBU, Philippines — Mipatigbabaw ang Philadelphia 76ers sa dumot nilang sangka batok ni Ben Simmons ug Brooklyn Nets, 137-133, sa NBA kagahapon didto sa Wells Fargo Center sa Philadelphia, Pennsylvannia.

Mao kadto ang unang higayon nga nakasangka ni Simmons ang kanhi niya teammate nga si Joel Embiid sukad siya gi-trade sa Brooklyn niadtong Pebrero sa miaging tuig nga nahatud ni James Harden sa Philadelphia.

Si Simmons kontrobersiyal nga milayas sa poder sa 76ers tungod sa mainit nilang panagbangi ni Embiid.

Gi-bohan si Simmons sa iyang pagtaaak og balik sa korte sa 76ers ug misamot pa ang iyang kalbaryo human sila naparot sa emosyonal ug tensiyonado kaayong duwa.

Si Tyrese Maxey maoy nangu sa Sixers uban ang 27 puntos samtang sila si Embiid ug Harden nagkuboya'g 49 puntos.

Si Seth Curry miharos og 32 puntos alang sa Nets, si  Kyrie Irving mi-iskor og 30 samtang si Simmons nalimitahan ngadto lamang sa 12 puntos.

Didto sa Portland, si Damian Lillard mipabuhagay og 60 puntos sa dihang gipayaka sa Portland Trail Blazers ang Utah Jazz, 134-124.

Sa laing aksiyon, si Jordan Poole mipasud sa iyang layup sa nahibilin nga 2.4 segundos aron aswaton ang Golden State Warriors ngadto sa kulbahinam nga daog batok sa Memphis Grizzlies, 122-120.

Si Stephen Curry mipupo og 34 puntos alang sa Warriors bisan og na-ejected sa pinal nga usa ka minuto sa duwa.

Midugang si Klay Thompson og 24 puntos samtang si Poole mitapos bitbit ang 21 puntos.

Didto sa Los Angeles, si Anthony Davis nagparamdam dayon sa iyang pagbalik human nakapalta og 20 ka duwa tungod sa injury pinaagi sa pagtali og 21 puntos sa dihang gipatikalbong sa Lakers ang San Antonio Spurs, 113-104. Mihimo sab og kasikas sila si LeBron James ug Patrick Beverley nga nagkumbinar og 38 puntos.

Mikuha sab og atensiyon si Giannis Antetokounmpo uban ang 33 puntos ug 14 ka rebounds sa dihang gibugha sa Milwaukee Bucks ang Denver Nuggets, 107-99.