400 mil miduyog sa walk with Mary
CEBU, Philippines — Moabot sa 350,000 ngadto sa 400,000 ka mga deboto ang miapil sa Penitential Walk with Mary, mas daghan kini itandi sa Walk With Jesus niadtong Enero 5.
Kini maoy gibutyag ni Police Col. Ireneo Dalogdog, City Director sa Cebu City Police Office ang maong data base kini sa assessment sa Cebu City Disaster Reduction and Management Office (CCDRRMO) ug Basilica Minore del Sto. Niño.
Bisan pa sa kadaghan sa mga deboto nga miapil sa kalihukan wala’y nadawat nga report ang kapulisan nga dunay nabiktima sa mga pagpanguot ug uban pa.
“Wala puy mga reported nga mga untoward incidents in relation to Walk with Mary activity,” sigon ni Dalogdog.
Nasayran nga kapin sa usa ka libo ka mga polis ang gi-deploy sa Penitential Walk with Mary nga nanukad gikan sa Fuente Osmeña Circle padulong sa Basilica Minore del Sto. Niño.
Hugot gyud nga seguridad ang gipatuman sa Cebu City Police Office sa mga kalihukan subay sa kapistahan sa balaang bata Sr. Sto. Niño aron masiguro ang kaluwasan sa mga deboto nga moapil sa mga relihiyosong kalihokan.
Ang Cebu City Police Office dunay augmentation gikan sa Mandaue, Lapu-Lapu, Cebu Police Provincial Office ug Regional Mobile Force Battalion (RMFB)-7.
Matod sab ni Dalogdog nga uban sila ni Cebu City Mayor Michael Rama nga misuroy sa basilica ug nakita nila nga dunay ginagmay nga palambuon.
Usa sa nakita nila nga dili ipa-padlock ang likod nga gate sa simbahan aron panahon sa emerhensiya adto moagi ang mga tawo aron makagawas.
“Dagko baya ‘tong gate sa may likod sa Basilica unya gi-padlock man gud to siya dapat dili to siya i padlock kay kung imo ‘to siyang i-padlock simbako lang magkaroon ng panic ang mga tawo kay nay ginagmay nga kasikas mag-panic, maghuot ang mga tao wala’y magawasan so kato siya sa likod very useful kay to siya para maagian sa mg tao going exit,” ni Dalogdog pa. (BANAT NEWS)
- Latest
