'Monster' Inoue mibakante sa upat ka bakus
CEBU, Philippines — Ang way pildeng Hapon nga kampiyon nga si Naoya 'Monster' Inoue mibakante sa tanang upat
niya ka mga bakus aron mokampanya sa mas bug-at nga super bantamweight division.
Gipahibawo sa 29-anyos nga si Inoue ang makapakurat niyang desisyon atol sa usa ka press
conference kagahapon didto sa Yokohama.
Usa ka bulan pa lamang ang milabay sukad giharos ni Inoue ang tanang mga korona sa
bantamweight division.
Nahimo siyang labing unang undisputed world bantamweight champion sud sa 50 ka tuig human
iyang gipatikangkang si Paul Butler sa England sa ika-11 nga hugna niadtong Disiembre aron
idugang ang WBO title niini sa iyang WBC, WBA ug IBF belts.
Apan si Inoue, nga nagkupot og perpektong 24-0 record uban ang 21KOs, boluntaryong mihawa
sa iyang mga trono aron sagubangon ang bag-ong hagit sa super bantamweight division.
"It will be a challenge against opponents who are bigger than me but this is the real fight
coming up. I'm really excited about it," matud pa ni Inoue, nga kanhi kampiyon sab sa light
flyweight ug super flyweight.
Wala pay boksidor nga nahimong undisputed world champion sa duha ka mananglahing weight
class apan si
Inoue naglantaw sa unahan nga mohimo og kasaysayan.
- Latest
