Melindo hait gihapon

Gibuntog ang bisitang Thai aron sakmiton ang OPBF Silver title

CEBU, Philippines — Mipakita og igong katakos ang kanhi world champion nga si Milan "El Metodico" Melindo aron pildihon ang lig-on kaayong Thai nga si Chaiwat Buatkrathok ug sakmiton ang OPBF Silver featherweight belt sa main event sa "Prime Fight Series 2" nga gipasiugdahan sa Prime Stags Sports Promotions niadtong Miyerkules didto sa Cebu City Sports Center.

Gamay ug mubo man tuod siya kay miduwa sa 126-pound weight class sa unang higayon apan ang 34-anyos nga sa Melindo hait gihapon kaayo. Gigamit niya og maayo ang iyang utok lakip na ang dalaygon niyang abilidad sa counter-punching aron wanihon si Buatkrathok sa dakong bahin sa 10 ka hugna nilang engkuwentro.   

Ang garbo sa Cagayan de Oro City daw sa nahutdan og hangin sa katapusang duha ka hugna apan madasigon nga nakalahutay hangtud sa katapusang segundo sa aksiyon.

Sa gipakita niyang kahanas ug kadasig, ang tanang tulo ka judges mipabor ni Melindo. Sila si Elmo Coloma ug Arnel Pasion parehong mi-iskor og 98-92, samtang si Edwin Barrientos mitali og 97-73 alang ni Melindo nga nagkupot na karon og 39-5 record uban ang 14KOs.   

“I'm not a knockout puncher. Yes, I’m looking forward to a knockout but I'm a counter-puncher, a technical fighter. I’m here to show the scientific way of boxing,” dason pa ni Melindo, nga kanhi naghari sa IBF ug IBO light flyweight division. Iyang gibira ang duha ka titulo human gipukan si South African Hekkie Budler pinaagi sa split decision sa katapusang higayon nga mipakita siya'g aksiyon atubangan sa mga Cebuano fans didto sa Waterfront Cebu City Hotel and Casino niadtong 2017.

Mapasalamaton si Melindo sa Prime Stags Sports, nga mao na karon ang nagkupot sa iyang karera, sa paghatag kaniya og higayon nga magdamgo aron mamahimong world champion og usab.

“Thankful ko sa Prime Stags and I'm also very happy daghan kaayong ni-support. Wa ko nag-expect because it was raining. Grabe ang ulan pero nanganhi gihapon sila bisan kuyaw na magbagyo. Para ni ninyo ug para sa Ginoo!” padayag pa ni Melindo.

Wa hinooy suwerti ang stablemate ni Melindo nga si Kit Ceron Garces, ang WBF Australasian flyweight champion, nga nakatilaw sa labing una niining pilde pinaagi sa unanimous decision sa mga kamot ni Noli James Maquilan sa Compostela Valley human sa walo ka hugna nilang binukbukay.

Sila si judge Edward Ligas, Raffy Osumo ug Neil Papas parehong mikadlit og 78-74 alang sa mas agresibo ug mas determinado nga si Maquilan.