Adlaw sa paghukom ni Melindo

CEBU, Philippines — Si Milan "El Metodico" Melindo hugtanong nagtoo nga duna pa siyay ikabuga aron mamahimong world champion og usab.

Mao kini ang buot pamatud-an ni Melindo (38-5, 14KOs) sa dihang iyang sangkaon si Chaiwat Buatkrathok (38-7, 25KOs) sa Thailand sud sa 10 ka hugna alang sa bakanting OPBF Silver featherweight belt sa main event sa "Prime Fight II" nga gipasiugdahan sa Prime Stags Sports Boxing Promotions karong adlawa diha sa Cebu City Sports Center.

Ang kumbati sa mga pro magsugod sa alas-6 sa gabii human sa serye sa mga amateur bouts.   

Ang 34-anyos nga si Melindo katapusang mi-away atubangan sa mga Sugbuanon niyang fans niadtong 2017 diin siya midaog pinaagi sa split decision batok ni South African Hekkie Budler aron sakmiton ang IBF ug IBO flyweight titles didto sa Waterfront Cebu City Hotel and Casino.

Ang garbo sa Cagayan de Oro City miangkon sa sayo pa dili mahimo nga mapilde siya ning awaya kay kon mahitabo kini madiskaril man ang tanan niyang mga plano lakip na ang paglangkat og balik sa iyang korona.

Malisud gyud hinoon kaayo nga tahas ang sagubangon ni Melindo.

Gawas nga mas taas, mas dako ug mas bug-at og kumo si Buatkrathok, mas aktibo sab ang bisitang Thai nga midaog kaupat sa unom niya ka away sa miaging tuig.

Samtang si Melindo kausa lamang makatikang ibabaw sa ring niadtong  2022.

Gipasalig hinoon ni Melindo nga andam kaayo siya nga mosanta sa kon unsa man gani ang ibirada ni Buatkrathok batok kaniya sa giatngan nilang engkuwentro.

Sa kulbahinam sab nga supporting main event, ang way pildeng WBF Australasian flyweight champion nga si Kit Ceron Garces (5-0, 4KOs) makigbinukbukay batok ni Noli James Maquilan (4-1, 3KOs) sa Compostela Valley.