Nets daog apan Durant nayayay
CEBU, Philippines — Ang Brooklyn Nets nakalingkawas batok sa Miami Heat, 102-101, luyo sa pagkamabayanihon ni Royce O'Neale apan wala makumpleto ang ilang selebrasyon gumikan kay nakahiagum man ang angol superstar nilang si Kevin Durant sa ikatulong kuwarter.
Si Durant, nga mi-average og 30 puntos matag duwa alang sa miratsadang Nets, nayayay sa nahibilin nga usa ka minuto sa ikatulong kuwarter sa dihang milandig kaniya ang teammate niyang Ben Simmons human kini milayat aron tapalan ang itsa ni Jimmy Butler.
Milingkod si Durant sa korte sud sa pipila ka segundos. Miaksiyon siya pagduwa og balik apan mibiya sa sab dayon padung sa ilang locker room
"He'll get evaluated tomorrow and then hopefully I'll have more info," matud pa ni Nets coach Jacque Vaughn. "Most likely it will include imaging, just to make sure we're good."
Si Durant mitapos uban ang 17 puntos. Si Kyrie Irving mihipos og 20 puntos samtang si O'Neale mikuha sab og atensiyon tungod sa krusyal niyang basket sa pinal nga 5.5 segundos nga maoy nakapadaog sa Nets.
Sa laing duwa, si James Harden mikolekta og 20 puntos, 11 ka rebounds, ug 11 ka assists aron pangulohan ang Philadelphia 76ers ngadto sa 123-111 nga pagpayaka sa Detroit Pistons.
Sa ubang mga resulta, ang Memphis Grizzlies ug Dallas Mavericks nakasinati og managlahi nga kapalaran samtang miduwa nga wala ang tagsa-tagsa nila ka mga alas.
Bisan og wala si Ja Morant, ang Memphis Grizzlies nagmalampuson batok sa Utah Jazz, 123-118.
Samtang ang Mavs, nga mitaak sa korte nga wa si Luka Doncic, nahagba sa mga kamot sa Oklahoma City Thunder, 120-109.
- Latest
