Manulong og balik sa Uropa William Go magsagubang og mas lisud nga misyon

CEBU, Philippines — Bag-ong tuig, bag-ong misyon alang sa Sugbuanong karting prodigy nga si William John Riley Go.

Lab-as pa gikan sa malampusong kampanya sa tuig 2022, ang 14-anyos nga si Go mopas-an og mas bug-at nga tahas nunot sa paggukod niya sa iyang damgo nga mamahimong Formula 1 driver ugma damlag. Sunod semana, si Go, ang labing unang Pinoy nga world champion sa Super ROK category niadtong South Garda Karting ROK Super Finals didto sa Lonato, Italy sa miaging tuig, manulong og balik sa Uropa alang sa hugot kaayong iskedyul sa mga lumba sa 2023.

Ning higayona sa mas lisud nga OK category.

"My plan is to race in the OK category," matud pa ni Go atol sa iyang send-off press conference didto sa Raddison Blu Hotel niadtong Huybes. “It’s a little bit harder because I will be racing against 18 years olds now and the best of the best. They're factory drivers and these guys are like four-time, five-time world champions in karting and they have had some test days in Formula 4."

Si Go, ang unang Pinoy nga nakadaog og tulo ka overall karting championships sa Asya sud sa usa ka season niatong 2019, nagplano nga mopakitag aksiyon sa WSK Series, nga daghan kaayo og mga karera sa kalendaryo niini sugod sa Champion’s Cup karong Enero 26 didto sa Lonato, Italy, ang susamang dapit diin iyang nalangkat ang una niyang world championship.

Iya sab nga gisaytan ang FIA European ug World Championships, ang RGMMC Champions of the Future, ang Winter Cup 2023 ug uban pa.

“For 2023, I want to capitalize on what I did last year. From the win in the ROK Cup Superfinal race to the WSK and FIA academy podiums, I want to do better so I can hopefully bring pride to the Philippines in the world of motorsports," dason pa ni Go, nga bag-ohay pang gipasidunnggan sa Golden Wheel Awards didto sa kaulohan gumikan sa dalaygon niyang salida nga naglangkob sa iyang silver-medal finish sa 2022 FIA Karting Academy sa Genk, Belgium ug third-place trophy sa WSK Euro Series didto sa Lombardia, Italy.

Labaw sa pagpanghakot og dungog, nagpanikad sab si Go nga sugdan ang iyang training sa mas lisud nga Formula 4, nga maoy iyang taytayan aron makab-ot sa iyang ambisyon nga makatikang sa prestihiyosong F1 Bata pa man tuod si Go apan dako kaayo ug bililhon ang iyang gihandum dili lamang alang sa iyang kaugalingon, sa iyang pamilya ug sa iyang team apan hasta sab sa labawng makagagahum ug sa pinangga niyang nasud.

“I don’t just do it for myself, I do it for my country, the Philippines. And I always do it for the team because I’m not just myself. I’m also working with a team, I’m working with a mechanic, with a coach, with a team boss and the people around me. That keeps me going and that’s the reason why I wanna win,” batbat pa ni Go.

Sa panahon nga bation siya og kahuyang ug kinahanglan niya og motibasyon aron magpadayon sa iyang tahas, si Go kinahanglan lamang nga motan-aw sa luyo sa iyang helmet diin nakatatak ang tulo ka makapadasig nga pulong  gikan mismo sa iyang inahan sukad pa sa pagsugod sa iyang karera niatong 2015, ang "WILL TO WIN".