Mitchell nag-wild, mipabuto og 71 puntos sa Cavaliers
CEBU, Philippines — Si Donovan Mitchell mipaulbo og makalisang nga 71 puntos aron pangulohan ang Cleveland Cavaliers ngadto sa 145-134 nga kadaogan sud sa overtime batok sa Chicago Bulls sa NBA kagahapon didto sa Rocket Mortgage FieldHouse sa Cleveland, Ohio.
Mao kadto ang kinadak-ang puntos sud sa usa ka duwa sukad si NBA legend Kobe Bryant mipabuhagay og 81 puntos natok sa Toronto Raptors niadtong tuig 2006.
Si Wilt Chamberlain gihapon ang nagkupot sa record alang sa labing dako nga iskor sa usa ka duwa human kini miharos og 100 puntos alang sa Philadelphia batok sa New York Knicks niadtong Marso 2, 1962.
Dako hinoon gihapon nga dungog ang nakab-ot ni Mitchell isip ikapitong player nga mikadlit og dili mominus 70 puntos sa usa ka duwa sa kasaysayan sa liga.
Sa laing bahin, sila si Klay Thompson, LeBron James ug Joel Embiid nagmangtas sab sa tagsa-tagsa nila ka mga koponan.
Si Thompson mipabuto og 54 puntos sa dihang gipasukarap sa Golden State Warriors ang Atlanta Hawks sa overtime, 143-141, samtang si James mipupo og 43 puntos sa dihang gipatikangkang sa LA Lakers ang Charlotte Hornets, 121-115.
Wala sab magpabitin si Embiid nga miwadwad og 42 puntos ug 11 ka rebounds alang sa Sixers, nga mipatiurok sa New Orleans Pelicans, 120-111.
Didto sa Houston, si Luka Doncic mikimada og 39 puntos, 12 ka rebounds ug walo ka assists sa dihang gibugha sa Dallas Mavericks ang Rockets, 111-106.
- Latest
