Kulbahinam nga motocross sa San Remigio karong weekend

CEBU, Philippines — Kulbahinam ug makalingaw nga aksiyon sa motocross mabalik sa Calambua, San Remigio karong Sabado, Nobiembre 26.

Si Lou Ornopia, ang gitamod nga amahan sa Cebu motocross nga konsehal sab sa amihanang lungsod sa Sugbo, nagkanayon nga ang ilang comeback race didto sa MS Motosuit Motorsports Park kabahin sa selebrasyon sa ka-151 nga founding anniversary sa San Remigio.

"Magpalumba ko tungod ug alang sa gugma sa motocross inubanan sa hangyo sa katawhan nga gimingaw na gyud sa maong aksiyon kay taud-taud naman ta wala makapahigayon niini. Mapahimuslan sab unya ni ang atong race track nga usa sa labing nindot dinhi sa Visayas," matud pa ni Ornopia, nga kanhi gipasidunggan isip "Sportsman of the Year" sa Sportswriters Association of Cebu (SAC).

Si Ornopia mapasalamaton sa hugtanong suporta sa San Remigio LGU nga gipangulohan ni mayor Al Pestolante sa umaabot nilang kalihukan ilabi na kay nahaum kini sa ilang tumong nga himoon ang ilang lungsod nga "motocross capital" sa Sugbo.

"Nalipay ko og dako kay gisuportahan ko sa konseho labi na ni Mayor Al Pestolante nga mipadayag pud sa hugot niyang suporta kay among naumol nga himoon ang among lungsod nga mamahimong motocross capital sa probinsiya," padayon pa ni Ornopia.

Ang karera nila karong weekend mao say sukaranan sa pagbalik sa lukop tuig nga motocross series didto sa San Remigio sunod tuig.

"Mahinumduman nga 23 years nakong nagpalumba diri sa Calambua nahunong lang tungod sa pandemiya. Karon nga normal na ang sitwasyon, regular na ni nato himoon labi na kay ibalik man nato ang atong motocross series next year," dason pa ni Ornopia.

“Gawas sa pagpalambo sa sports, amo sab gitinguha nga mapakita ang kaanindot sa among lugar, mapalambo ang turismo sa among dapit ug makahatag og kapanginabuhian sa mga tawo pinaagi niining atong gibuhat,” panapos pa ni Ornopia.