Lady Stags naka-isa sa SSL
![Lady Stags naka-isa sa SSL](https://media.philstar.com/photos/2022/10/15/gorayeb2020-02-2022-37-292020-04-2715-56-34_2022-10-15_22-26-45.jpg)
MANILA, Philippines — Pinayuko ng San Sebastian College - Recoletos (SSC-R) ang Emilio Aguinaldo College (EAC), 25-13, 25-21, 25-21, para magarbong tapusin ang kampanya nito sa Pool B ng Shakey’s Super League Pre-season Collegiate Championship kahapon sa Rizal Memorial Coliseum.
Hataw si Kath Santos ng 10 puntos tampok ang siyam na attacks para pamunuan ang Lady Stags sa unang panalo nito.
Tinapos ng San Sebastian ang group stage tangan ang 1-3 rekord sa Pool B habang wala pa ring panalo ang Emilio Aguinaldo sa dalawang pagsalang.
“This is still a learning team. We still have one (preseason) league to join. But come the NCAA, they (my players) have to be firm already,” ani San Sebastian head coach Roger Goyareb.
Masaya si Gorayeb na tumataas ang laro ng kanyang tropa partikular na ang mga rookies.
“I have seen a lot of improvement from my players. At least my players, especially the rookies, were able to get valuable experience and exposure in this tournament,” ani Gorayeb.
Nagtala si Anne Formento ng walong puntos habang naglista sina Rhoan Manlapaz at Krizza Reyes ng tig-pito para sa Lady Generals.
Muling sasalang ang EAC kontra sa University of Sto. Tomas ngayong alas-10 ng umaga.
Maghaharap din ang UAAP champion National University (NU) at semifinalist Ateneo de Manila University (ADMU) sa alas-5:30 ng hapon.
- Latest