Team TBL kampiyon sa 5th Randall Cup
CEBU, Philippines — Ang Team TBL ni Harrison Go mipatigbabaw batok sa Homeboys Alpha ni Christopher Rey "Toper" Caruana, 88-83, sa sikit kaayo nilang duwa sa final aron paglugwa nga kampiyon sa 5th Randall Cup basketball tournament ning bag-ohay pa lamang didto sa Cebu Eastern College (CEC) lower court.
Si Reniel Labajo maoy bida sa TBL uban ang 20 puntos. Gipasidunggan siya nga Most Valuable Player gumikan sa maanindot niyang salida sa tibuok nga bahin sa torneyo.
Usa ka espesyal nga Sportsmanship award ang gihatag ngadtong Johnmar “Insik” Cuizon tungod sa pagpakita niini og dalaygong ehemplo sa usa ka maayong player sa sud ug gawas sa korte.
Sa sangka alang sa ikatulong dapit, ang Homeboys Original ni Webster “Tatskie” Ong mipakaging sa Homeboys Legends ni James Junrie Años, 75-64.
Gisalmotan og unom ka teams, ang Homeboys Basketball miorganisa sa malampuson nga liga agig paghandum ni ilang founder nga si Randall Joseph Prado.
- Latest
