ICC Blue Hawks kampiyon sa Macrohon
CEBU, Philippines — Gipayaka sa Immaculada Concepcion College (ICC) Blue Hawks sa Manila ang University of Cebu (UC) Webmasters 91-81, sa tinagakay nilang final match aron langkaton ang kampiyonato sa 2022 Macrohon Invitational Inter-Collegiate 25 Under Basketball Tournament nga gipahigayon niadtong Septiembre 17-20 didto sa Macrohon municipal covered court sa Southern Leyte.
Sikit pa unta kaayo ang kumbati sa sinugdanan. Human sa 23-23 nga panagtabla, ang Blue Hawks miposte lamang og dos puntos nga bentaha sa halftime, 45-43.
Apan ang Blue Hawks nanginit sa ikatulong kuwarter diin sila milusad og nagbagang 30-21 rally aron inaton ang ilang labaw ngadto na sa 11 puntos, 75-64, padung sa pinak nga 10 minutos sa aksiyon.
Wala na molingi pa sukad niadto ang Blue Hawks aron kabihon ang P100,000 nga ganti.
Sa sangka alang sa ikatulong dapit, gilubong sa OCCCI Ormoc Sheermasters ang Maasin City selection, 113-80.
Sa laing bahin, si Macrohon Mayor Alan Jose K. Aroy mipadangat sa mainiton niyang pasalamat sa tanang mga partisipante sa paghimo nila sa labing unang major sports event sa ilang dapit sukad sa pagulbo sa pandemiya kapin sa duha ka tuig na ang milabay nga malampuson.
- Latest
