Sarok Weavers napakyas sa misyon

Miyukbo sa Pampanga Delta sa PSL U21 National Finals

CEBU, Philippines — Ang Consolacion Sarok Weavers napakyas sa ilang tinguha nga mokulit og makasaysaynong grandslam human sila miyukbo ngadto sa Pampanga Delta, 76-71, sa tinagakay nilang kampiyonato sa 2022 Pilipinas Super League (PSL) 21 Under National Finals nga gisaksihan sa bagang duot sa mga fans niadtong Lunes sa gabii didto sa Cebu City Sports Institute (CCSI) sa Barangay Sawang Calero.

Human misakmit og back-to-back titles sukad sa pangpanghawod nila PSL U21 Aspirants Cup didto sa Roxas, Zamboanga del Norte niadtong Abril, gisaytan sa Sarok Weavers ang labing dako nga premyo sa tanan - ang nasudnong korona.

Apan ang damgo sa Sarok Weavers nga makakumpleto og talagsaong three-peat nahagsa human sila gibuntog sa mga Pampangueño, nga gikoronahan ang ilang kaugalingon isip labing unang PSL U21 national champion.

Ang mga tirador sa Pampanga nga sila si Justin Bautista, Joshua Miclat, Kevin Santos, ug Charles Delfino maoy nakabuak sa dughan sa mga Consolacionanons.

Si Bautista mihipos og 15 puntos ug walo ka rebounds, si Miclat ug Santos mitali og 12 puntos matag usa samtang si Delfino mitampo og 10 puntos ug lima ka assists alang sa mga Kapampangans kansang coach mao mismo si Pampanga Governor Dennis "Delta" Pineda. Pait ang nahiagumang kaparotan sa Sarok Weavers ilabi na kay nakabangon pa unta sila human mabiyai og 10 puntos ug nakalabaw pa gani og siyete puntos, 60-53, sa nakaon nga 63 segundos pa lamang sa katapusang kuwarter.

Ang Sarok Weavers nakaminitinar sa ilang labaw, 64-57, apan ang Pampanga miresbak pinaagi sa nagkayong 11-1 run aron pag-abante niini og tres puntos, 68-65, sa pinal nga tres minutos sa aksiyon.

Ang Consolacion nakalabaw sa katapusang higayon, 69-68, gumikan kay sila si Bautista ug Miclat milusad og 7-0 rally aron pagseguro sa kalamposan sa Pampanga, 75-69, sa nahibiling 66 segundos.

Si Froiland Maglasang maoy nangu sa Sarok Weavers uban ang 15 puntos, tulo ka rebounds, ug duha ka assists. Si Rovello Robles miposte og double-double nga 12 puntos ug 16 ka rebounds, si Matthew Flores mi-iskor og 11 uban ang lima rebounds samtang si Dave Paulo midugang og 10 puntos sa pilderong kawsa. Apan ang sinaligang team captain sa Consolacion nga si Paulo Dalumpines nangitlog ug wala malapuntos human nasipyat ang tanan niyang walo ka itsa. Wala man tuod nila makab-ot ang ilang misyon apan ang Sarok Weavers mapasigarbuhon gihapon tungod sa dalaygon nilang kampanya ug sa paghatag nila og maanindot nga representasyon sa pinangga nilang lungsod.

"We came up short to get the championship but we truly played our best of the best to give pride and honor to our beloved Consolacion. To our fellow Consolacionanons, thank you all for your whole-hearted support, prayers, and love for our Sarok weavers," matud pa ni coach Paul Alelu Flores.

"We may fell short of our goal, but what a ride it has been for the team. It was the best 10 months of my life," buhagay pa ni team manager Marc Malazarte. "Who would have thought that a small town in Cebu with unknown coaches and players would leave their mark in the national stage. I can't ask for anything. No regrets, only lessons learned."