AEG kampiyon sa 4th CABC Corporate Cup

CEBU, Philippines — Gipakaging sa AEG ballers ang Boysen Paints, 74-60, aron langkaton ang kampiyonato sa 4th Cebu Architects Basketball Club (CABC) Corporate Cup niadtong Dominggo didto sa PAREF-Springdale gym sa Barangay Lahug, dakbayan sa Sugbo.

Si Dexsel Caadan maoy bida sa AEG human mipupo og 19 piuntos, 15 ka rebounds, lima ka assists, pito ka steals ug duha ka blocks.

Mikuha sab og atensiyon ang kasaligang big man nga si Arbinson "Bong" Gabison nga mibugha og 12 puntos, 12 ka rebounds, duha ka assists, upat ka steals ug duha ka blocks alang sa AEG.

Midugang si Duane Anino og 12 puntos samtang si Zach Elisha Go miamot og 11 puntos, siyam ka rebounds, unom ka assists ug tulo ka steals alang sa AEG, nga alkansi og otso puntos, 9-17, human sa unang 10 minutos sa aksiyon.

Apan ang AEG dali nga miresbak hinungdan nga nakasikit ngadto sa usa na lang ka lugas sa haltime, 34-35.

Ang AEG milusad dayon og 22-16 nga ataki hinungdan nga naka-ilog og singko puntos nga labaw, 56-51, human sa tulo ka kuwarter.

Misamot pa ang kainit sa AEG sa katapusang hunat sa duwa diin ilang gilabhan ang Boysen Paints, 18-9,  aron pagsilyo sa 14 puntos nilang kalamposan.

Si Chester Hinagdanan maoy nangu sa Boysen Paints  uban ang 16 puntos, 12 ka rebounds, upat ka assists ug tulo ka steals samtang si Michael Judilla dunay 12 puntos, pito ka rebounds, ug duha ka assists sa pilderong kawsa.

Sa sangka alang sa ikatulong dapit, si Jonas Panerio mipaulbo og 40 puntos uban ang duha ka rebounds, lima ka assists ug duha ka steals sa dihang gipaksit sa Buildrite ang Unitec Pipes, 80-71. Si Panerio gipaluyohan nilang Kim-Kim Rebosura ug Joy Salvador nga mihipos og 14 puntos matag usa.