Sarok Weavers 5-0 ang tirada
CEBU, Philippines — Tinguha sa defending champion Consolacion Sarok Weavers nga inaton ang mainit nilang ratsada sa dihang ilang harongon ang OCCI-Ormoc Sheermasters sa 2022 Pilipinas Super League (PSL) 21 Under-VisMin karong adlawa didto sa Barangay Lawaan I gymnasium sa dakbayan sa Talisay.
Human ang kanhi way pildeng Cagayan de Oro Sealcor Kingfishers gipakuratan sa Bukidnon Cowboys niadtonf Biyernes sa gabii, ang Sarok Weavers nag-inusara na karon sa liderato bitbit ang perpektong 4-0 nga baraha.
Ang mga batos nilang coach Paul Alelu Flores ug Lee Mhar Dahil nanghinaut nga mokadlit sa ikalima nilang sagunson nga daog sa ilang pakigsangka batok sa bisitang Ormocanon ballers sa main game nga gikatakda sa alas-8 sa gabii.
Angayan hinoon nga magmatngon ang Sarok Weavers gumikan kay ang Sheermasters lab-as pang mihaw-as gikan sa makapadasig nga 89-63 nga demolisyon sa Lapu-Lapu City Pantum aron tablahon ang ilang record ngadto sa 2-2.
Sa pasiunang duwa sa alas-6 sa gabii, ang Sherilin-Unisol Mandaue City Plastic Men ug San Fernando Buffalos mag-abot sa laing all-Cebuano showdown.
Ang Plastic Men ug Buffalos parehong nagkupot og 2-3 nga marka.
Naglungot-lungot sab silang makabawi human mahisukamod sa miagi nilang mga duwa nga sulagma kaayong batok sa Davao Occidental Dreamers.
- Latest
