Sarok Weavers 4-0 na

CEBU, Philippines — Gipatikangkang sa defending champion Consolacion Sarok Weavers ang Bogo City Bugoys, 78-66, aron pagpabiling way pilde sa 2022 Pilipinas Super League (PSL) 21 Under-VisMin leg niadtong Hybes sa gabii didto sa Barangay Lawaan I Gymnasium sa dakbayan sa Talisay.

Sila si Paolo Dalumpines ug Keaton Taburnal mao lamang ang mirehistro og double figures apan ang Sarok Weavers mipakita og dalaygon nga team effort dayon nga ngadto sa pag-angkon og bahin sa liderato uban ang Cagayan de Oro Sealcor Kingfishers bitbit ang perpektong 4-0 nga mga baraha.

Si Dalumpines mitapos uban ang 11 puntos, usa ka rebound ug tulo ka assists samtang si Taburnal milansang og 10 puntos, duha ka rebounds ug tulo ka assists alang sa Sarok Weavers nga kontrolado kaayo ang duwa sukad misutoy ngadto sa sayong 26-13 nga labaw.

Padayon nilang gikastigo ang Bugoys sa ikaduhang kuwarter, 20-13, aron paburoton ang ilang bentaha ngadto na sa 20 puntos sa halftime, 46-26.

Si James Gica mihipos og 16 puntos, tulo ka rebounds ug tulo sab ka assists samtang si James Daniel Gelig  dunay 13 puntos, duha ka rebounds ug duha ka assists apan way nahimo gumikan kay ang Bugoys misukarap sa ikaupat nilang pilde.

Sa sayo pa, gilampornas sa OCCCI Ormoc Sheermasters ang Lapu-Lapu City Pantum, 89-63, aron tablahon ang ilang record ngadto sa 2-2.

Dominante kaayo ang Sheermasters nga sa usa ka higayon naglabaw og 32 puntos, 85-53, luyo sa nagkayong 21-0 rally sa nahibilin nga singko minutos sa duwa.

Si Jim Taala maoy nangu sa Ormoc uban ang 24 puntos ug siyam ka rebounds ug gisundan kini ni Charles Libatog bitbit ang 12 puntos ug lima ka rebounds.

Sila si Jhoernel Tangkay ug Jeco Bancale mipupo og 16 puntos matag usa alang sa Lapu-Lapu, nga nasugamak  sa ikatulo nilang pilde sud sa upat ka duwa.