Nagkadugay, nagkalami: 'Spiderman' sa PBA Arwind Santos daw sama sa bino
CEBU, Philippines — Ang PBA superstar nga si Arwind Santos daw sama sa usa ka bino.
Nagkadugay, nagkalami.
Si Santos naka-angkon og laing dungog sa mabulokon niyang karera human siya opisyal nga naapil sa PBA 10,000-point club tulo ka adlaw pa ang milabay.
Iya kining nakab-ot atol sa duwa tali sa NorthPort ug sa kanhi niya team nga San Miguel Beer sa nagkainit nga Philippine Cup niadtong Sabado sa gabii didto sa Smart Araneta Coliseum.
Si Santos nakatigum na karon og 10,012 puntos human mitali og 25 puntos sa maong duwa diin ang Batang Pier gilubong sa Beermen, 122-106.
Tungod niini, ang 41-anyos nga garbo sa Pampanga nahimong ika-17 nga miyembro sa maong espesyal nga grupo ug ikatulong player sa miaging 21 ka tuig nga nakabira sa maong dungog sunod nilang James Yap (2017) ug Mark Caguioa (2018).
Nakapasidlak kini og samot sa karera sa tinamod nga "Spiderman" nga sa miagi lamang nga season nasakop sa Mythical First Team ug All-Defensive Team gawas nga gibayaw sab nga Defensive Player of the Year.
Si Santos nagkanayon nga ang paglihay niya sa mga injury sud sa 16 ka tuig niyang karera usa sa mga nag-unang hinungdan nganong nalinya siya uban sa mga halangdon pangan nga naglangkob sa 10,000-point club sa liga sama nilang four-time MVP Ramon Fernandez ug Alvin Patrimonio, Robert Jaworski, Atoy Co, Bogs Adornado, Abet Guidaben, Allan Caidic, Philip Cesar, ug uban pa.
"God is good dahil wala akong injury na malala, healthy pa rin ako, nakakapag-perform pa rin ako at the same time. Hindi ko talaga akalain ito," matud pa ni Santos, kansang abilidad unang nabaid samtang nagduwa sa Far Eastern University (FEU) Tamaraws sa UAAP.
- Latest
