Dancesport team Cebu City nangharos sa GenSan
CEBU, Philippines — Ang mga miyembro sa Dancesport Team Cebu City misidlak na usab human mikolekta og 16 ka gold, pito ka silver ug pio ka bronze medals sa 2nd Philippine Open and 9th General Santos Summer Youth Festival Dancesport Championship niadtong weekend didto sa Lagao Gym sa General Santos City.
Sila si Francis Dave Sombal ug Mitchloni Dinauanao maoy nangu sa malampusong kampanya sa Dancesport TCC uban ang upat ka bulawang medalya sa Standard Youth D ug C ug sa Latin Youth D ug C events. Sila si John Lloyd Leyson ug Ouie Selene Rendon mitampo og duha ka golds sa Youth A Standard ug Latin ug ingon man sila si Kharl Michael Miñoza ug Ashley Cullo sa Standard ug Latin Junior 2A.
Wala sab magpabitin ang pares nilang John Paul Mocorro ug Eleanor Hayco nga naka-gold sa Latin Senior 2C ug ingon man sila si Shardie Abellana ug Marjorie Abellana sa Grade B Latin ug sila si Jefreyl Palimocon ug Mary Ann Mata sa ProAm Latin. Duha tanan ka gold ang nalangkat ni Mata kay nanghawod man sab siya sa Special Event 1C uban ang partner niyang si Lark Jabonero.
Ang uban pang mitunol og gold medal sa Dancesport TCC mao sila si Ronald Ruiz ug Jocelyn Versteeg (Standard Senior 1C), Joel Madera ug Engracita Zabala (Standard Senior 2C), Dylan Jacob Esmero ug Sofia Isabella Maree Quilaton (Standard Junior 2C), ug Michael Angelo ug Stephanie Sabalo (Grade A Latin).
- Latest
