Korona sa PSL U21 damgo nga natuman alang ni Malazarte

CEBU, Philippines — Gikan sa sinugdanan, nagkupot na siya og mahinungdanong papel alang sa  Consolacion Sarok Weavers.

Nagtrabaho sa hilom luyo sa eksena, nagpas-an siya og mabug-at nga responsibilidad pagpadagan sa inadlaw nga gimbuhaton sa team isip ilang manedyir diin iyang giseguro nga iyang matubag ang mga panginahanglan sa tagsa-tagsa nila ka miymebro.

Uban ang tinguha nga mohimo og kasaysayan, ang ilang tahas nagkalisud sa dihang mitunob na sila sa Roxas, Zamboanga del Norte diin mahitabo ang gubat sa labing unang Pilipinas Super League (PSL) Under 21 Aspirations Division Invitational Cup.

Niadtong puntoha, iya lamang gipahimuslan ang higayon nga naabot siya sa maong level sa kompestisyon kay naghatag man kini kaniya og katagbawan sa iyang gihandum sukad sa iyang pagkabata.

"I know nga lig-on ang among team especially when we completed an 11-0 sweep in our tuneup games," matud pa ni Sarok Weavers team manager Marc Malazarte. "Pero in all honesty, wala gyud ko mag expect nga ma-champion mi kay dili sab basta-basta among mga kontra, they're also the best in their areas."

"Mao to pag-abot namo sa Roxas, wala na kaayo nako gihuna-huna ang championship kay added pressure ra sa akoa ug sa team," dugang pa ni Malazarte. "But deep inside, I was really hoping na ma-achieve gyud namo ang goal nga among gi-set sa team since Day 1 of our practice. It's only when nasud mi sa finals ug among kontra napilde na sab namo pag-elimination naka-ingon ko nga mura'g dako na gyud ning opportunity para namo."

Tuod man, ang tanan nilang kahago ug sakripisyo sud sa kapin upat ka bulan nilang preparasyon nagbunga sa dihang gi-sweep sa Sarok Weavers ang host Roxas Vanguards sa ilang best-of-three finals series aron paglugwa nga labing unang kampiyon sa PSL Under 21 Aspirants Division duha ka semana na ang milabay.

Apan labaw sa pagsakmit sa makasaysayanong korona, ang espesyal nga higayon mitaop sa dughan ni Malazarte kay naghatag kini og katumanan sa iyang damgo ugaling lang kay sa lain nga kapasidad.

"Para sa ako, fulfillment ni sa tanang damgo nako sukad sa akong pagkabata. Fan man gyud kaayo ta og basket pero wa ta masuwertian nga kita mismo gyud moduwa," paambit pa ni Malazarte. "Pero nangita gyud ko og way mao nang fulfilling kaayo kay not only nga na-champion ko, kuyog pa gyud nako didto ang akong anak, akong mga friends, ug akong pamilya. Of all the challenges I faced, it was truly rewarding and gratifying in the end."

Milantaw og balik uban ang mapasalamatong kasingkasing, si Malazarte mi-angkon nga dili nila matungas ang bukid sa kalamposan kon wala pa ang pagpursige sa mga players ug sa coaching staff ug labaw sa tanan ang hugtanong suporta sa LGU Consolacion ubos sa liderato ni mayor Joannes "Joyjoy" Alegado ug ingon man nilang konsehal Marilou Casul ug Vic Maglasang,ug Sangguniang Kabataan Federation (SKF) President Carlos Donn Flores.

"Ang difference namo sa ubang teams, number one, naa gyud ang disiplina ug ang respeto. Way superstar og feeling ug ang matag usa naa gyuy role nga gidala. Tinabanagay ming tanan. We work as a unit inside and outside the court. For me that's the biggest factor," dason pa ni Malazarte.

"Labaw sa tanan, akongway sukod nga pasalamat sa LGU Consolacion headed by mayor Joyjoy Alegado kay dako kaayo ang gihatag nilang tabang financially, morally,and spiritually. Sila ang rason nganong nadasig ug naka-sustain mi throughout the tournament," padayn pa niya.

"The other factor sad ani si coach Paul Alelu Flores. He acted not only as a coach, sobra pa sa coach ang iyang role didto. Nitabang gyud siya pag-atiman aron matarong ang kahimtang sa mga players kay that's the promise nga among gihatag sad sa parents sa mga bata."

Human makab-ot ang ilang misyon, si Malazarte nagbarog nga mapasigarbuhon gumikan kay nahimo man nila ang buot nilang pagabuhaton. Karon, naglantaw siya sa unahan uban ang panghinaut nga ang kalamposan nga ilang natagamtaman makatabang og dako sa mga players sa ilang paggkugod sa ilang ambisyon.

"I am proud to say nga ang uban namong mga players naa nay offers from schools not only in Cebu but also in Manila. So happy kaayo ko kay mao man gyud ni ang nag-una namong tumong nganong amo ning gibuhat, aron mahatagan ang mga bata og opportunity and along the way makagiya mi nila aron matuman ang ilang mga pangandoy sa kinabuhi through basketball. Para nako, mao ni ang greatest achievement sa team," panapos pa ni Malazarte.