Sultan madasigon nga mabihag si Butler

CEBU, Philippines — Si WBO Intercontinental bantamweight champion Jonas Sultan mipasalig nga iyang buhaton tanan kutob sa iyang mahimo aron pildihon si Paul Butler sa ilang sangka ugmang adlawa didto sa M&S Bank Arena sa Liverpool, England.

Ilogan nilang Sultan ug Butler ang interim WBO bantamweight title.

Si Sultan mihulip lamang sa dapit sa kababayan niyang si John Riel Casimero nga modepensa unta sa iyang bakos batok ni Butler.

Apan si Casimero gidid-an sa British Boxing Board of Control nga maka-away tungod sa paggamit niini og 'sauna' nga usa ka dakong kalapasan sa ilang mga lagda.

Tungod niini, si Sultan nga mikuyog ni Casimero sa pagbiyahe niini sa England kalit nga gibunlot aron mao nay makigharong ni Butler alang sa interim title.

Bisan pa man og gipuli lamang siya, si Sultan masaligon kaayo sa iyang tsansa batok ni Butler gumikan kay kanunay man siyang nangandam ug hugtanon ang iyang training sa miaging mga bulan bisan og wala siyay naka-iskedyul nga away.

“This is a big moment for me and I am hungry for it. There is a lot of hard work that has gone into my preparation and it was meant to be that I get in the ring against Butler this week," matud pa ni Sultan nga unang nailhan isip sakop sa ALA Boxing Gym.

Si Sultan nagkupot og 18-5 record uban ang 11KOs samtang si Butler nagtangag og 35-2 nga baraha uban ang 15KOs.