Clinton Gualiza misidlak sa 22nd Ornopia Motocross Cup

CEBU, Philippines — Ang garbo sa Sugbo nga si Clinton Gualiza maoy nangu sa mga mananaog uban ang duha ka tropeyo sa kampiyonato sa 22nd Lou Ornopia Motocross Cup ning bag-ohay pa lamang didto sa MS Motosuit Motorsports Park sa Barangay Calambua, lungsod sa San Remigio amihanang bahin sa Sugbo.

Si Gualiza, lumad gikan sa Barangay Taptap, dakbayan sa Sugbo, mipakita sa iyang kahanas sud sa lapokon ug malisud nga racetrack aron paglugwa nga kampiyon sa intermediate ug expert open.

Si Gelo Leonardo, gikan sa Ozamiz City ug apo sa mga tag-iya sa Medina College, mipahiluna sa ikaduhang dapit sa intermediate category ug ikatulo sa expert division.

Ang laing out-of-town entry nga mihimo og kasikas mao si Jed Luna gikan sa Surigao del Sur nga nalandig sa ikatulong puwesto sa open enduro.

Mikuha sab og atensiyon si Gyle Aguilar human nanghawod sa novice open. Si Inting Casinay maoy na-2nd apan dunay laing rason nga magselebrar gumikan kay siya man maoy midominar sa beginners open diin sila si John Allen Coberos ug Carlos Russell maoy mi-okupar sa ikaduha ug ikatulong dapit.

Nagparamdam sab si Julie Mae Cablao human gisakmit ang korona sa ladies division. Si Corin Piano miangkon sa ikaduhang dapit ug gisundan kini ni Shane Querol.

Sa iyang bahin, si Ayen Ledesma mibira og duha ka titulo sa executives 40-44 ug 50-above age groups. Si Baden Ong ang naghari sa executives 45-49 class. Ang uban pang nag-unang mananaog mao sila si Boboy Geraldo (veterans), Matt Velasquez (50cc), Carl Villahermosa (65cc), ug Dave Seblos (elite).

Sa laing bahin, way kasudlan ang kalipay ni MS Motosuit big boss Lou Ornopia sa naglagiting nga kalamposan sa labing una niyang karera sukad sa pag-ulbo sa kalibutanhong pandemiya duha ka tuig na ang milabay nga nakapadasig kaniya pagbuhi og balik sa iyang motocross series ning tuiga.

"Sa tinuoray lang, naguol gyud ko nga giulan ang atong lumba apan sa gipakita sa bul-og sa mga tawo, dako kaayo ang akong kalipay kay atong napamatud-an ang walay paglubad nga suporta sa atong kaigsoonan nga mga riders ug dumodoong," paambit pa ni Ornopia.

"Kani nagpataas sa kahigayonan nga mopadayon kita sa atong motocross series karong tuiga labi na og buligan ta sa kahitas-an nga dili na mohamok og balik ang coronavirus nga maoy nakapatay sa kinabuhi ug kapanginabuhian sa atong mga katawhan," dugang pa sa tinamod nga sportsman.

Ang 22nd Ornopia Cup nahimong posible tungod sa hugtanong suporta nilang Andy Uy, Bantay Construction ni Myrna Rodrigo, Kapenarra ni Zenaida Cataquez, Zic Oil, N Style ni Nico Ornopia, JSUPT Felipe Montejo, SNR MBJ Motomaze Shop, F&FO Motor Parts ni Fiel Ornopia, Dinah RBS Construction and Supply ni Rosalina Sobrio, RMO Motor Parts ni Boy Ornopia, NF Enterprises oni Noli Ornopia, Olilab Oil, Inc., Hon. Annalyn Flores Tuling, ug LMO Motor Parts and General Merchandise.