Montaño gibayaw nga MVP, giduyogan ni Montemayor sa Mythical 5

Sarok Weavers nimartsa sa finals

CEBU, Philippines — Ang garbo sa Consolacion nga si Gyle Patrick Montaño literal nga naglutaw sa panganod sa  himaya human siya gibayaw nga Most Valuable Player atol sa espesyal nga seremonyas sa halftime.

Human sa duwa, gipamatud-an sa hait nga shooting guard gikan sa Barangay Pulpogan nga  angayan lang gyud siyang tunolan sa maong pasidungog.

Si Montaño miwadwad og MVP level performance sa dihang gitagak sa twice-to-beat Sarok  Weavers ang Sealcor Cagayan de Oro Kingfishers, 78-73, aron pagmartsa ngadto sa kampiyonato sa  Pilipinas Super League (PSL) Under 21 Aspirants Division Invitational Cup kagahapon didto sa President Manuel A. Roxas Sports Complex sa Roxas, Zamboanga del Norte.

Si Montaño mipabuto og 21 puntos uban ang siyam ka rebounds, upat ka assists ug duha ka  steals alang sa Sarok Weavers nga makigharong sunod batok sa mopatigbabaw tali sa host Roxas  Vanguards ug Bukidnon Cowboys.

Ang Cowboys naka-angkon pa og laing kinabuhi human gipiog ang Vanguards, 73-67. Ang  tinagakay nilang sangka duwaon karong hapon.

"Thankful ako sa award na eto," matud pa ni Montaño, nga unang mihimo og pangan uban  sa Southwestern University (SWU)-Phinma Baby Cobras sa CESAFI sa wala pa nahimong star player  sa Lyceum Baby Pirates sa NCAA.

"Para sa amin lahat to. Hindi ko makukuha ang award na eto kung wala ang tulong ng mga  teammates ko," dugang pa ni Montaño.

Nahimong triple ang selebrasyon sa Sarok Weavers gumikan kay si Montaño awtomatik nga  naapil sa Mythical Five kauban ang iyang teammate nga si Rojan Montemayor.

Si Montemayor, lumad gikan sa Alegria, Cebu, mipatak na sab og solidong double-double  nga 17 puntos ug 11 ka rebounds nga iyang gipalamanan og upat ka assists ug duha ka blocks.

Ang duha ka sagunson nga basket ni Montemayor wala lamang makabuak sa 72-72 nga  panagtabla, nakapalabaw sab kini sa Sarok Weavers sa hingpit,76-72, sa nahibilin nga 1:37 sa duwa.

Ang Kingfishers mihulga sa katapusang higayon, 73-76, gumikan kay si Neon Chavez  kalmadong mipasud sa iyang free throws aron pagpaginhawa og lawom sa Sarok Weavers uban ang  singko puntos nga labaw sa pinal nga 16 segundos.