CPG-Bohol ni coach Edsel Vallena 9-0 na sa Super Cup

CEBU, Philippines — Naporma ang ilang team upat na lamang ka adlaw sa dili pa magsugod ang torneyo.

Wala pa gani niya mailhi ang uban niyang mga players sa sinugdanan.

Apan ang Sugbuanong coach nga si Edsel Vallena nakahimo og usa ka dakong milagro uban sa CPG-Bohol Dolphins sa nagkainit nga  kumbati sa GlobalPort-Pilipinas VisMin Super Cup.

Nagsandig sa solido nilang teamwork ug pagsalig sa Ginoo labaw sa tanan, ang CPG-Bohol mikastigo sa SND Barracudas, 112-90, aron inaton ang way pilde nilang ratsada ngadto sa siyam ka duwa niadtong Martes sa gabii didto sa Vitaliano Agan Coliseum sa Zamboanga City.

Si John Bondoc mitali og 16 puntos, siyam ka rebounds ug lima ka assists sa dihang si Vallena ug ang CPG-Bohol miposte sa ikaduha nilang sunod-sunod nga daog human mikumpleto og 7-0 sweep sa unang hugna sa eliminasyon aron pagpabilin nga bugtong team nga wa pay pilde sa liga.

Alang ni Vallena, ang respeto ug pagsalig sa iyang mga players maoy mga mahinungdanong yawi sa sa impresibo nilang salida.

"Naporma ning amo team four days lang before mag-start ang liga. Wala pa gani ko makaila sa uban nako mga players ato nga time," paambit pa ni Vallena, ang founder ug head trainer sa Sirlitz Basketball Training Camp nga nahakulma og pipila ka tang-an nga mga basketbolista sa Sugbu apil na niini ang PBA player nga si Paul Desiderio.

Bisan pa man niini, napanday ni Vallena ang iyang koponan ngadto sa usa ka hiniusa ug dekalibreng puwersa.

"Una sa tanan, nakuha nako ang respeto sa ako mga players. Ikaduha, mi-respond sila sa system nga gusto nako ipadagan sa team," matud pa ni Vallena , nga maoy nagtimon sa Cebu Institute of Technology-University (CIT-U) Wildcats sa wala pa gihunong sa pandemiya ang aksiyon sa Cebu Schools Athletic Foundation, Inc. (CESAFI) sud sa duha ka tuig na karon.

"Sa tinuoray lang, wala gyud mi bisan usa ka star. Matag usa kanila dunay kaugalingon nga role mao nang malipayon ug kuntento kaayo kay ila gyud gibuhat ang tagsa-tagsa nila ka mga papel sa team. Kon unsa man gani among nakab-ot karon, mao ni ang resulta," dugang pa ni Vallena.

Mapaubsanon hinoong miangkon si Vallena nga usa ka malisud nga tahas ang pagtaak sa kampiyonato. Apan ila kining suwayan ug andam silang moatubang ning maong sa hagit.

"Lisud gyud ni nga hagit labi na karon nga halos tanan namo kontra ari naka-focus namo. Nanghinaut lang ko nga we will make it all the way to the finals. We will just take it one game at a time. Amo lang buhaton tanan kutob sa among mahimo ug isalig ang uban sa Ginoo kay siya man lang gyud ang amo gisaligan," panapos pa ni Vallena.