Pacquiao mapasigarbuhon sa iyang anak
CEBU, Philippines — Si Pinoy ring legend Sen. Manny Pacquiao gibati og tumang garbo ug kalipay human ang kinamaguwangan niyang anak nga si Emmanuel "Jimuel" Pacquiao, Jr. mikulit sa labing una niining daog isip usa ka amateur boxer didto sa Amerika.
Determinado nga mosunod sa tunob sa banggiitan niyang amahan, si Jimuel mipukan ni Mexican-American Andres Rosales pinaagi sa desisyon sa una niyang away ubos sa junior welterweight division naidtong Domingo atubangan sa bagang duot sa mga fans didto sa House of Boxing Training Center sa San Diego, California.
Ang 20-anyos nga si Jimuel nakakuha sa iyang lisensiya sa boksing niadto lamang Disiembre sa miaging tuig.
Sa iyang sangka batok ni Rosales, si Jimuel nagrepresenta sa Wild Card Gym ni Hall of Fame trainer Freddie Roach.
Human gideklara nga mananaog si Jimuel, ang amahan niyang si Pacquiao mipadangat gilayon sa mainiton niining pahalipay ngadto sa pinangga niyang anak ug kapangalan.
"Congratulations to my son Jimuel Pacquiao on fighting and winning his first U.S. amateur fight at junior welterweight! I’m so proud of you," buhagay pa ni Pacquiao, ang bugtong eight-division world champion sa kasaysayan.
- Latest
