Dragic mipirma uban sa Nets

CEBU, Philippines — Ang Slovenian guard nga si Goran Dragic pormal nga mipirma og kontrata uban sa Brooklyn Nets kagahapong adlawa.

Ang maong lakang naghiusa og balik sa 35-anyos nga si Dragic uban sa kanhi niya teammate sa Phoenix Suns nga si Steve Nash nga mao na karon ang iyang coach.

Katorse ka tuig nga beterano sa NBA, si Dragic seguradong makapalig-on sa puwersa sa Nets nga ikawalo karon sa Eastern Conference bitbit ang 31-28 nga baraha.

Iyang makauban sa Nets ang superstars nga sila si Kevin Durant, Kyrie Irving, ug Ben Simmons.

Sa kinatibuk-an sa iyang karera, si Dragic nakapakita'g aksiyon sud sa 872 ka duwa uban sa Phoenix Suns, Houston Rockets, Miami Heat ug Toronto Raptors, nga mi-trade kaniya sa San Antonio Spurs sayo ning bulana sa wala pa siya labniha sa Nets.

Mi-average siya og 13.9 puntos, 3.1 rebounds, 4.8 assists ug 1.0 steals matag duwa.

Si Dragic nahimong NBA All-Star niadtong 2018 ug gibayaw nga Most Improved Player uban sa Suns naidtong 2013-14 season.