Phoenix Suns namawi, gilat-an ang wizards

CEBU, Philippines — Dali nga nakabangon ang Phoenix Suns sa miagi nilang pagkadagma ug gipahimungtan sa ilang kapungot ang Wizards Wizards nga ilang gilampaso, 95-80, sa NBA kagahapon didto sa Capital One Arena.

Si Deandre Ayton mipabuhagay og 20 puntos ug 16 ka rebounds alang sa Suns, nga daling nakabawi human gidagit sa Atlata Hawks niadtong Biyernes hinungdan nga naputol ang 11 ka sagunson nilang daog.

Bangis kaayo si Ayton nga miposte og double-doule uban ang 13 puntos ug 11 ka rebounds sa first half pa lang daan hinungdan nga mibulhot ang Suns ngadto sa 17 puntos nga labaw, 59-32.

Dominante kaayo ang Suns nga sa usa sa higayon mi-abante og 36 puntos nga nakapalipong sa Wizards.

Si Chris Paul dunay 14 puntos ug siyam ka assists, sila si Mikal Bridges ug Cam Johnson parehong mi-iskor og 12 puntos samtang si Devin Booker mipupo og 11 puntos, pito ka rebounds ug lima ka assists alang sa Suns nga padayong naghari sa liderato bitbit ang 42-10 record.

Si Montrezl Harrell mitali og 15 puntos sa Wizards nga natagak ngadto sa 24-28.

Sa ikasiyam nga sunod-sunod nga higayon, wala makaduwa ang leading scorer sa Wizards nga si Bradley Beal kay nayayay hinungdan sa sagunson nilang pagkasukarap.-

Sa laing duwa, si Jimmy Butler mikadlit og 27 puntos, samtang si Bam Adebayo midugang og 20 puntos ug 12 ka rebounds sa dihang gipatilaw sa Miami Heat ang Charlotte Hornets sa ikaupat niining sagunson nga pilde, 104-86.

Misalida sab si Tyler Herro uban ang 19 puntos alang sa Heat nga nagbitbit na karon og 34-20 nga baraha.

Sila si Terry Rozier ug Miles Bridges nagkumboya og 31 puntos alang sa Hornets nga mikolapso human milabaw og singko puntos sa halftime, 51-46, hinungdan nga nahagba sa ika-26 nga higayon uban ang 28 ka daog.—-Emmanuel B. Villaruel

Lineup sa TNT kumpleto na

Nahitsas na’g balik ang lineup sa TNT Tropang Giga ug tayming kaayo kini gumikan kay naghinangat na ang pagsugod og balik sa PBA Governors’ Cup nga gikatakda karong Pebrero 11.

Matud pa ni TNT coach Chot Reyes nga sila si Kib Montalbo ug Troy Rosario mobalik na ug moduwa uban kanila sa labing unang higayon ning komperensiya.

“Kib Montalbo is already practicing fully, and Troy Rosaio is practicing fully, and by the resumption of the PBA, I expect to have both of them back,” matud pa ni Reyes.

Gi-operahan ang tuhod ni Montalbo human gisakmit sa Tropang Giga ang Philippine Cup title sud sa Bacolor bubble samtang nayayay ang likod ug ingon man ang komingking ni Rosario sa susamang All-Filipino Cup finals.

Ang pagbalik nilang Rosario ug Montalbo seguradong mapakadasig sa TNT nga nagkupot og 2-2 record sa wala pa temporaryong nahunong ang liga.

Sa kasamtangan, ang Tropang Giga atoa sa Malarayat, Batangas diin sila mipahigayon og training camp agig preparasyon sa pagbalik sa aksiyon sa liga.

Ang TNT katapusang miduwa niadtong Disiembre 26 diin sila nakaipspot batok sa Rain or Shine, 95-92, luyo sa bag-o nilang import nga si Aaron Fuller.