Sa ikaduhang higayon sud sa tulo ka gabii Hornets gitumba na sab ang Bucks

CEBU, Philippines — Si LaMelo Ball mipasud sa krusyal niyang basket sa nahibiling 15 segundos samtang si Terry Rozier mi-iskor og 27 puntos sa dihang gibihag sa Charlotte Hornets ang defending champion Milwaukee Bucks sa ikaduhang higayon sud sa tulo ka gabii, 103-99, sa NBA kagahapon didto sa Spectrum Center sa Charlotte, North Carolina.

Bangis kaayo si Ball nga mibubo og 18 sa iyang 23 puntos sa second half. Mihimo sab og kasikas si Miles Bridges uban ang 17 puntos ug 11 ka rebounds alang sa Hornets, nga midaog kaunom sa miagi nilang walo ka duwa ug miinat sa ilang record ngadto sa 12-5 didto sa ilang korte ning season.

Si Khris Middleton mikadlit og 27 puntos ug 11 ka assists samtang si Giannis Antetokounmpo midugang og 26 puntos, 13 ka rebounds ug walo ka assists alang sa Bucks nga gipatikalbong sab sa Hornets sa iskor nga 114-106 niadto lamang Dominggo.

Ang Bucks naglabaw og usa ka lugas sa halftime, 48-47, apan ang Hornets miratsada sa ikatulong kuwarter diin sila mi-abante og 15 puntos luyo sa pagpanginit ni Ball.

Dako sab og naambag si Rozier nga miposa og upat ka tres. Mao kadto ang ikapitong higayon sa miaging walo ka duwa diin siya milansang og dili mominus upat ka 3-pointers.

Sa laing aksiyon, si Jaylen Brown mipabuhagay og 26 puntos ug 15 ka rebounds samtang si Jayson Tatum miposte og 24 puntos ug 12 ka rebounds sa dihang gibuntog sa Boston Celtics ang Indiana Pacersb sud sa overtime, 101-98.

Mikuha sab og atensiyon si Joel Embiid human mibugha og 31 puntos, walo ka rebounds ug unom ka assists sa dihang gikatisgo sa Philadelpha 76ers ang Houston Rockets, 111-91.

Sa uban pang mga resulta, ang Detroit Pistons mipakaging sa Utah Jazz, 126-116, samtang ang New York Knicks milampornas sa San Antonio Spurs, 111-96.