OPBF Silver champ Abne mitikang sa world rankings
CEBU, Philippines — Dul-an usa ka bulan sukad gibira ang labing una niyang bakus isip regional champion, si April Jay “Astroboy” Abne nimartsa ngadto sa world rankings.
Ang pambato sa ARQ Gym nalista karon sa No. 38 sa labing maayo nga mga flyweight contenders sa prestihiyosong World Boxing Council (WBC) nga toa magbase sa Mexico.
Ang promosyon ni Abne tayming ug haum kaayo nga regalo alang ni ARQ big boss Jason Arquisola, nga nagsaulog sa adlaw niyang natawhan sa dihang gipagawas ang WBC November ratings kagahapon.
“Dako kaayo ko’g pasalamat sa Ginoo nga naapil nako sa WBC ratings,” matud pa sa 22-anyos nga si Abne. “Naabot ning nindot nga balita atol pa gyud sa birthday sa among big boss nga si sir Jason Arquisola mao nang doble akoang kalipay.”
Si Abne mikatkat sa hagdanan si WBC tulo ka semana human midaog pinaagi sa split decision batok sa mas beteranong si Bienvenido “Fairtex Ben Sniper” Ligas sa Elorde Stable aron langkaton ang Oriental and Pacific Boxing Federation (OPBF) Silver flyweight title atol sa “Engkuwentro Dos” nga pasundayag sa ARQ Promotions niadtong Oktubre 30 didto sa Ibabao-Estancia Gym sa dakbayan sa Mandaue.
Si Abne, nga nagkupot og perpektong 7-0 record uban ang 3KOs, mipasalig nga doblehon pa niya ang iyang paningkamot karon nga naka-angkon na siya og dapit sa labing maayo nga mga flyweights sa kalibutan.
“Akong ikapasalig nga maninguha pa ko og maayo aron madungagan ang akong kusog ug abilidad,” dason pa sa garbo sa Manticao, Misamis Oriental. “Dili ra diha kutob ang akong pangandoy nga maka-abot ani nga ranking kay tinguha gyud nako makab-ot akong damgo nga ma- world champion sa umaabot.”
- Latest
