De los Santos mibuak kaugalingong record
CEBU, Philippines — Way hunong ang pagpangolekta niya og bulawang medalya ning tuiga.
Og human sa pipila ka bulan nga kakugi ug paningkamot, nakab-ot na gyud sa Sugbuanong World No.1 e-karateka nga si Orencio James "OJ" De los Santos ang iyang misyon.
Ang 31-anyos nga si De los Santos milabni sa ika-37 niyang gold medal ning tuiga human gidominar ang Athlete's E-Tournament #6 kagahapon.
Mipatigbabaw siya batok ni Matias Domont-Moreno sa Switzerland pinaagi sa sikit kaayong desisyon sa final round, 25.66-25.
Tungod niini, gipapas ni De los Santos ang personal best niyang 36 ka golds nga naghimo kaniya nga No.1 e-karate athlete sa tibuok kalibutan taliwala sa pandemiya sa miaging tuig.
Bisan pa man sa naglagiting nga kalamposan nga iyang natagtaman, ang two-time Southeast Asian (SEA) Games bronze medalist way plano nga mohunong sa iyang pagpangharos.
Buot pa niya nga mo-angkon og dugang dungog ug tak-opon ang tuig uban ang masipang buto sama sa iyang gibuhat naidtong 2020.
"I finally broke my previous overall record of 36 to 37 golds this year," buhagay pa sa PAREF-Springdale outstanding alumnus ug "Gawad Lasalyano" awardee sa iyang Facebook page. "But I'm not finished.There are still a few more tournaments left for this year. Time to finish it strong!"
- Latest
