Heat gidaoban ang Mavs

CEBU, Philippines — Si Kyle Lowry milansang og unom ka tres sa iyang 26 puntos sa dihang gilampaso sa Miami Heat ang Dallas Mavericks, 125-110, sa NBA kagahapon.

Gawas ni Lowry, lain pang tulo ka Heat players ang mihimo og kasikas.

Si Tyler Herro mi-iskor og 25 samtang sila si Jimmy Butler ug Bam Adebayo nagkumboya og 45 puntos alang sa Heat nga temporaryo karong nag-una sa Eastern Conference standings bitbit ang 6-1 win-loss record.

Wala kaugpo ang Mavs bisan pa man og ang alas nilang si Luca Doncic mipaulbo og 33 puntos.Mipuntos si Jalen Brunson og 25 samtang si Tim Hardaway Jr. midugang og 17 puntos sa pilderong Mavs.

Sa laing duwa, si Giannis Antetokounmpo mipupo og 28 puntos, siyam ka assists, ug walo ka rebounds sa dihang gipaksit sa Milwaukee Bucks ang Detroit Pistons, 117-89, aron pakgangon ang tulo ka sunod-sunod nilang pilde.

Milampos ang Bucks bisan og wala makaduwa si Khris Middleton kay nagpositibo sa Covid-19.

Ang Bucks wala na mopaginhawa pa sa Pistons human kini nila gilubong og 18 puntos sa halftime, 57-39.

Sila si Jordan Nwora ug Pat Connaughton dunay 16 puntos matag usa, samtang sila si Bobby Portis ug Justin Robinson nagkumbinar og 23 puntos alang sa Bucks nga nagbitbit na karon og 4-4 nga baraha.

Nangu sa mikagar nga Pistons mao si Jerami Grant uban ang 21 puntos.