Ginebra, Phoenix mag-ilog katapusang luna sa quarterfinals
CEBU, Philippines — Ang defending champion Barangay Ginebra Kings ug Phoenix Super LPG Fuel Masters mag-abot sa usa ka knockout match alang sa ikawalo ug katapusang luna sa 46th PBA Philippine Cup quarterfinals karong adlawa didto sa Bacolor, Pampanga.
Gikatakda ang ilang sangka sa alas 4:35 sa hapon sa Don Honorio Ventura State University Gym diin ang modaog makigharong sunod sa twice-to-beat nga No.1 seed TNT Tropang Giga samtang ang mapilde manamilit na sa torneyo.
Ang Kings naka-angkon pa og laing kinabuhi human gipukan sa NorthPort Batang Pier ang Alaska Aces niadtong Huybes sa gabii. Kon ang Alaska pa ang midaog, hayan nga matagak na unta ang Ginebra. "We've been given an unexpected reprieve so we want to do our best and take advantage of it," matud pa ni Ginebra coach Tim Cone.
Ang Kings, Fuel Masters, ug Terrafirma Dyip mitak-op sa ilang kampanya sa eliminasyon bitbit ang parehong 4-7 win-loss records.
Apan ang Ginebra ug ang Phoenix maoy magtinagakay alang sa nahibiling luna sa playoffs gumikan sa mas taas nilang quotient batok sa Terrafirma.
"The No. 8 spot won't be given to us. We have to earn it," dason pa ni Phoenix coach Topex Robinson.
Nakabentaha hinoon sa plastada ang Phoenix gumikan kay ang Ginebra motaak sa korte nga wala ang duha ka sinaligan nilang sila si Japeth Aguilar ug Scottie Thompson.
"The guys know the road is tough and has been tough but it starts with one step. That step starts with our game against Phoenix," kanayon pa ni Cone, kansang puwersa mibuntog sa Phoenix, 94-87, sa miagi nilang engkuwentro niadtong Septiembre 15.
- Latest
