Fuel Masters gitiwasan nagkagidlay nga bossing
CEBU, Philippines — Gitiwasan sa Phoenix Super LPG Fuel Masters ang kalbaryo sa nagkagidlay nga Blackwater human ilang gilampaso ang Bossing, 114-92, sa PBA Philippine Cup didto sa Don Honorio Ventura State University gym sa Bacolor, Pampanga.
Ang Fuel Masters alkansi og siyete puntos, 22-29, human sa nag-unang 12 minutos sa aksiyon apan milusad og bagsik nga resbak pinaagi sa nagkayong 60-39 rally sa tunga-tungang mga kuwarter aron gaposte og 82-68 nga labaw.
Padayon nga gikastigo sa Fuel Masters ang Bossing sa katapusang kuwarter, 32-24, aron pagrehistro niini og 22 puntos nga demolisyon.
Sila si Justin Chua ug Jason Perkins parehong mikadlit og 17 puntos samtang si Mathhew Wright mihipos og 16 puntos alang sa Fuel Masters nag nagtangag na karon og 4-5 win-loss record.
Si Mike Tolomia miratsada og 23 puntos samtang si Marion Magat dunay 14 puntos apan nakawang ang ilang paningkamot gumikan kay nagpabiling bokya ang Bossing human sa siyam ka duwa.
Sa laing engkuwentro, si Garvo Lanete mipupo og 18 puntos samtang sila si Robert Bolick ug Jamie Malonzo nagkumboya og 29 puntos sa dihang gilampornas sa NorthPort Batang Pier ang Terrafirma Dyip, 104-84.
Ang Northport nagkupot na karon og 3-3 nga baraha human makasagunson og duha ka daog samtang ang Dyip nadakin-as ngadto sa 3-6.
- Latest
