Pacquiao koronahang ‘Champion for Life’ sa WBA
CEBU, Philippines — Ang presidente sa World Boxing Association nga si Gilberto Mendoza mangunay pag-adto sa Manila sunod bulan aron itunol ang WBA “Champion for Life” belt ngadto ni Manny Pacquiao.
Si Mendoza mismo ang mipahibawo ning maayong balita ngadto ni Pacquiao atol sa usa ka miting nga gihan-ay ni MP Promotions president Sean Gibbons pipila ka oras sa wala pa mikatkat ang Pinoy sa ring aron sangkaon si WBA ‘Super’ welterweight champion Yordenis “54 Milagros” Ugas sa Cuba niadtong Dominggo didto sa T-Mobile Arena sa Las Vegas, Nevada.
Gipakuratan ni Ugas ang inilog kaayong si Pacquiao pinaagi sa unanimous decision.
Sa usa ka Instagram video nga gi-post ni Mendoza, ang pangu sa WBA makita nga personal nga nangayo og pasaylo ni Pacquiao tungod sa nahitabong kalibog kabahin sa WBA ‘super’ welterweight title. Kahinumduman nga niadtong Enero ning tuiga, kontrobersiyal nga gilangkatan sa WBA og korona si Pacquiao. Human niiini, ilang gi-promote si Ugas nga super champion samtang si Pacquiao gibutang ngadto sa ‘champion in recess’.
“I was fooled, I’m sorry about it,” padayag pa ni Mendoza agi’g pag-angkon sa iyang sayop.
Gipasaylo hinoon dayon ni Pacquiao si Mendoza kay kabahin man kini sa iyang trabaho.
Si Mendoza mipadayag nga ilang gi-andam karon ang usa ka honorary title alang ni Pacquiao nga tipik sab sa selebrasyon sa sentenaryo sa WBA.
“This is a hundred years of the WBA, centennial year, you’re gonna be a champion for life. I have a belt made, and we’ll come with a resolution later,” matud pa ni Mendoza. “I hope to see you soon in Manila with the belt and everything else.”
- Latest
