Susan Itaas, una ug bugtong Woman NM sa Sugbu
CEBU, Philippines — Wala man tuod siya maghuna-huna kaayo niini apan dili malimod nga si Susan Itaas nakakulit na og marka nga dili mapapas isip labing una ug bugtong Woman National Master sa kasaysayan sa Cebu chess.
Nakab-ot ni Itaas ang maong talagsaong dungog sa dihang mitapos siya sa ikatulong puwesto atol sa 1980 National Women’s Championship nga gipahigayon didto sa Marco Polo restaurant sa Makati.
Apan milanat pa og 11 ka tuig ang milabay usa pa niya nahibaw-an nga iya na diay nakab-ot ang maong titulo.
Kini nahitabo atol sa iyang pagsalmot sa 1991 Women’s National Open didto saI ndang, Cavite.
Human niini, si Itaas nahimong sakop sa Team Philippines nga mikumbati sa 1992 World Chess Olympiad didto sa Manila ubos sa paggiya ni Grandmaster Eugene Torre.
Sa kinatibuk-an, tulo ka higayon nga girepresentahan ni Itaas ang nasud sa prestihiyosong torneyo apil na niadtong 1994 didto sa Moscow, Russia ug 1996 didto sa Yerevan, Armenia.
Sa miaging mga katuigan, nagpabiling duol sa dughan ni Itaas ang duwang ahedres ug gani padayon siyang nagsuporta sa Cebu chess bisan taliwala sa pandemiya.
Timaan niini, siya maoy nagpaluyo sa senemanang Coleto Itaas Blitz Series ning tibuok buwan sa Agosto ubos sa superbisyon sa Cebu Executives and Professionals Chess Association (CEPCA) diin siya usa ka mapasibarbuhong Miyembro.
“ That’s my way of giving back to chess even in small ways,” dason pa ni Itaas nga toa na karon nakabase sa New York.
Si Itaas nagkanayon nga kon mahatagan lang og igong suporta ug pagtagad, nagkantaw siya ngadto sa usa ka mahayag nga ugma sa Cebu chess.
“I have high hopes for chess in Cebu,”padayag pa ni Itaas.“ But we have to train them young and focus on the game. I’ve always believed in the adage, “practice makes perfect”. But first, all the necessary support especially financial should be given. Not so much but enough.”
- Latest
