Magno mitikang sab sa Round of 16
CEBU, Philippines — Ang boksingerong si Irish Magno milansang sa ikaduhang daog sa Pilipinas sa nagkainit nga Tokyo Olympics human iyang gimakmak si World No.17 Christine Ongare sa Kenya pinaagi sa unanimous decision, 5-0, didto sa Kokugikan Arena kagahapon sa buntag. Ang tanan nga lima ka judges mipabor sa 25-anyos nga si Magno sa iskor nga 30-27, 30-27, 30-27, 30-27), ug 30-26.
Gumikan niini, ang garbo sa Iloilo mi-abante sa Round of 16 sa women's flyweight division (48-51 kg).
Sama sa iyang kababayan nga si Nesthy Petecio nga midaog sab sa una niyang away ubos sa featherweight class (54-57 kg), si Magno nanginahanglan na lang og duha ka daog aron pagseguro sa Team Phl og bronseng medalya.
Ang Pilipinas katapusang nakadaog og medalya sa boksing 25 ka tuig na ang milabay sa dihang si Mansueto "Onyok" Velasco mipugnit og silver sa 1996 Atlanta Olympics.
Bukid hinoon ang tungason ni Magno gumikan kay sangkaon niya sunod mao man ang topseed nga si Thai Jutamas Jitpong karong Huybes sa alas 12:24 sa hapon.
- Latest
