Cebuana apil sa World Youth Chess Championships

CEBU, Philippines — Ang Sugbuanon nga si Marphine Faith Mangubat mokumbati sa labing dako nga bantawan sa iyang karera pinaagi sa FIDE Online Rapid World Cadets and Youth Chess Championships nga gikatakda karong Agosto 1-31.

Si Mangubat naka-angkon og katungod nga maglangkob sa Philippine team sa maong torneyo nga pagasalmotan sa magduduwa og ahedres nga nag-edad og 10 ngadto sa 18 anyos sa tibuok kalibutan isip usa sa mga top grand finalists atol sa National Age Group Chess Championships.  "I feel so happy that I am able to be part of this tournament. I am so grateful for this opportunity. I'll do my best in this tournament," matud pa ni Mangubat.

Si Mangubat naka-abot sa quarterfinals sa rapid chess event sa 30th Southeast Asian (SEA) Games diin ang nasud maoy mi-host niadtong 2019.

Ang 18-anyos nga estudyante sa Southwestern University (SWU)-Phinma mao say top lady player sa Cebu City Machers nga mipakita'g aksiyon sa Professional Chess Association of the Philippines (PCAP), ang labing unang propesyonal nga liga sa chess sa nasud.