Celtics vs Wizards; Pacers kontra Hornets
Sa play-in tourney ngayon
NEW YORK - Magsisimula ngayon ang play-in tournament sa Eastern Conference kung saan magtutuos ang No. 7 Boston Celtics at No. 8 Washington Wizards at maglalaban ang No. 9 Indiana Pacers at No. 10 Charlotte Hornets.
Ang mananaig sa Celtics at Wizards ang magbubulsa sa No. 7 berth at lalabanan ang No. 2 Brooklyn Nets sa first-round playoffs.
Ang matatalo ang sasagupa sa mananalo sa Pacers at Hornets para pag-agawan ang No. 8 spot na haharap sa No. 1 Philadelphia 76ers sa first-round playoffs.
Sa Boston, muling aasahan ng Celtics sina Jayson Tatum kasama sina Kemba Walker, Evan Fournier, Marcus Smart at Tristan Thompson habang sumailalim si Jaylen Brown sa wrist surgery.
Babanderahan naman nina star guard Bradley Beal at NBA all-time triple-double king Russell Westbrook ang Wizards.
“We fought through so much to get here,” ani Westbrook na napiling Eastern Conference Player of the Month.
Sa Indianapolis, inaasahang gagamitin ng Pacers ang kanilang naunang 125-113 paggiba sa sibak nang Toronto Raptors sa pagsagupa sa Hornets.
- Latest
