Wizards daog sa Cavs
CEBU, Philippines — Nakuha sa Washington Wizards ang katapusang luna sa play-in tournament human miposte og 120-105 nga kadaogan batok sa Cleveland Cavaliers sa NBA kagahapon didto sa Capital One Arena Washington, DC.
Gipangulohan ni Russell Westbrook ang daog human miposte sa labing una niyang "triple-double" sukad iyang nasiak ang rekord ni Oscar Robertson sa labing daghan "triple-double".
Si Westbrook mirehistro og 21 points, 17 assists ug 12 rebounds alang sa iyang ika-183 career triple-double ug ika-37 niya niini nga season. Nakig-uban na siya ni Hall of Famers John Stockton ug Isiah Thomas isip mao lang ang mga magduduwa nga adunay labing menos 15 ka assists sa pito ka sunod-sunod nga duwa sa kasaysayan sa NBA. Si Davis Bertans mitampo og 17 puntos, samtang sila si Rui Hachimura ug Robin Lopez nag-amotay og 14 puntos sa balanse opensa sa Wizards, kansang pito ka magduduwa ang mitikdol og double figures.
Ang Wizards misakmit og luna sa bag-ong play-in tournament alang sa playoffs nga naglakip sa Nos. 7-10 seeds sa matag conference.
Ang play-in games duwaon karong Miyerkules diin ang No. 7 seed moharong sa No. 8 sa Game 1 ug No. 9 seed batok No. 10 sa Game 2. Ang mapilde sa unang game moduwa sa modaog sa second game sa Mayo 20.
Mipuwesto ang Wizards isip No. 10 seed uban ang 33-38 nga baraha.
Si Collin Sexton miratsada og 26 puntos ug si Jarrett Allen mikamada'g 18 puntos ug 14 ka rebounds sa Cleveland nga napilde sa ikapitong sunod-sunod ka higayon sa ilang road games. Si Isaac Okoro mibunot og 17 puntos ug si Cedi Osman mipaksit og 16 puntos sa natagak na nga Cavs.
- Latest
