Iranian GM moduga'g kusog sa Toledo Trojans sa PCAP’s Wesley So Cup
CEBU, Philippines — Ang Iranian Grandmaster nga si Amir Bagheri modugang og kalig-on sa line-up sa Toledo City Trojans sa Wesley So Cup, ang reinforced conference sa Professional Chess Associaion of the Philppines (PCAP) online tournament nga gikatakda ugma, Mayo 15.
Ang 42-anyos nga si Bargheri mao lamang ang ikaduhang Iranian nga nakadawat og GM status sa chess.
Si Bagheri nikwalipay sa FIDE World Chess Championship didto sa Caesars Palace sa Las Vegas niadtong 1999, apan pakyas pag-apil tungod sa problema sa visa. Niduwa siya pagka sunod tuig, apan napalagpot sa unang hugna.
Nirepresentar siyaalang sa Iran national sa Chess Olympiads tulo ka tuig, 1998, 2000 ug 2008.
Si Atty. Jean Gacang, ang co-team owner sa Trojans masaligon nga si Bagheri makatabang pagpalampo sa ilang performance sa duha ka bulan nga PCAP's All-Filipino Conference nga natapos niadtong Abril.
Sa pagpangulo ni Bonn Rainauld Tibod, ang Trojans nahimutang sa ikalimang dapit sa Southern Conference.
Gawas nilang Gacang ug Tibod, si Bagheri mopakita'g aksiyon uban nilang team manager FA Felix Poloyapoy Jr. IM Rico Mascariñas, NM Rommel Ganzon, Rogelio Enriquez, Jr., Ronald Ganzon, Richard Natividad, Glicerio Pardillo Jr., Christopher Tubalado ug Jinky Catulay.
Kapin sa P300,000 nga ganting salapi ang iapud-apod ngadto sa mga mananaog diin ang kampiyon moulit bitbit ang P150,000. Ang mopahiluha gikan sa ikaduha hangtod sa ikaupat mobulsa og P75,000, P40,000 ug P20,000. Dugang pa niini, ang Best Import, Player of the Conference ug Finals Most Valuable Player makadawat og P10,000 matag usa.
- Latest
