Griffin usa na ka free agent human niuyon sa contract 'buyout'

CEBU, Philippines — Kon adunay sinugdanan, aduna sa'y katapusan ug karon natapos na ang panahon ni Blake Griffin uban sa Detroit Pistons.

Si Griffin ug ang Pistons nagkauyon sa usa ka contract buyout nga naghimo sa beteranong forward nga usa ka free agent.

Lain na sab kining mahinungdanon nga lakang aron makabarog og balik ang Pistons nga nagbitay karon sa kinailawmang bahin sa Eastern Conference standing bitbit ang 9-24 nga baraha.

"I thank the Pistons organization for working together on an outcome that benefits all involved and I wish the franchise success in the future," sumala pa ni Griffin kagahapon sa usa ka pamahayag nga gipagawas sa koponan.

Niadtong Pebrero, gipahibalo sa Pistons nga ilang tangtangon si Griffin sa line-up samtang nag-usisa kini sa iyang ugma, usa ka tin-aw nga sinyales nga ang star forward talihawa na.

Sa miaging bulan, ila sab nga gi-trade si Derrick Rose ngadto sa New York Knicks.

Si Griffin nga magsaulog sa ika-32 niyang adlaw'ng natawhan karong bulana, napunta sa Detroit pinaagi sa trade atol sa 2017-2018 season. Iyang gitabangan ang koponan aron makasud sa playoffs, apan ang kondisyon sa iyang panglawas ang gikabalak-an sa Detroit ug mao sab kini sa dihang niduwa pa siya sa Los Angeles Clippers.

Si Griffin adunay average nga 12.3 points, 5.2 rebounds ug 3.9 assists sa 20 niya ka mga duwa  karon nga season.