Mac Belo dagdag boltahe sa Meralco

MANILA, Philippines — Walang ibang nasambit sa pamunuan ng Blackwater si Mac Belo kundi ang mainit na pasasalamat sa loob ng apat na taon nitong pananatili sa Elite.

Nagdesisyon ang Blackwater management na i-trade si Belo sa Meralco kapalit nina Baser Amer at Bryan Faundo.

Hindi inaasahan ni Belo ang mga biglaang pangyayari kaya’t nagulat ito nang malaman ang trade.

“Nagulat ako (sa trade) pero ayun sobrang thankful ako sa Blackwater management sa lahat ng tulong nila sa akin,” wika ni Belo.

Sa Blackwater nagsimula ang professional basketbal career ni Belo. Kinuha ito ng Elite noong 2016 PBA Annual Rookie Draft sa Special Gilas Pilipinas Round.

Nakapagtala ito ng averages na 11.4 points at 5.3 rebounds sa huling season nito sa Elite noong PBA Season 45 Philippine Cup sa Clark bubble.

Malungkot itong lilisanin ang kampo ng Blackwater na naging tahanan nito sa nakalipas na apat na taon.

Subalit sabik na rin ang dating Far Eastern University standout sa bagong oportunidad at bagong hamon na haharapin nito sa kanyang bagong tahanan sa Bolts.

“Malungkot (na iiwan ang Blackwater) and at the same time excited sa bagong team ko dahil talaga namang magandang organization ang Meralco,” ani Belo.

Handa itong ibuhos ang lahat ng kanyang puwersa para matulungan ang Bolts.

Target ni Black na buuin ang kumbinasyon nina Belo, Cliff Hodge at Raymond Almazan.