Gaballo gimandoan pakig-away ni Rodriguez sa usa ka rematch

CEBU, Philippines — Gihatagan og 30 diyas ang kampo nilang Reymart Gaballo ug Emmanuel Rodriguez aron makig-negosasyon alang sa 'rematch sa duha ka boksidor.

Ang Wold Boxing Council (WBC) nimando og usa ka 'rematch' tali sa duha kay wala makumbinser ang kampo ni Rodriguez sa 'split decision' nga kadaogan sa Pinoy'ng boksidor nga si Gaballo sa miaging bulan aron sakmiton ang Interim bantamweight title.

Ang kampo sa kanhi International Boxing Federation (IBF) bantamweight champion nga si Rodriguez, niprotesta sa resulta sa away niadtong Disyembre 19 didto sa Mohegan Sun Arena sa Uncasville, Connecticut kay sa ilang tan-aw ang Puerto Rican nipakita og maayong labok ug angay hatagan sa daog.

Mao sab ang nakita sa WBC ug kinahanglang nga adunay 'rematch' sa duha ka boksidor.

Si judge David Sutherland mihatag og 118-110 pabor ni Rodriguez, apan ang laing duha ka mga hurado nga silang Don Trella ug John McKaei miiskor og 116-112 ug 115-113 matag usa alang kang Gaballo.

Ang daog nitugot sa 24-anyos gikan sa Palomolok, Cotabato del Sur aron kuptan ang iyang rekord nga walay tatsa, 24-0 uban ang 20KOs.

Sa iyang bahin, si Rodriguez nahiagom sa iyang ikaduhang pilde sa 21 ka mga away nga naglakip sa 12KOs.