Kanhi ALA Boys eksplosibo sa unang away ubos sa Sanman

CEBU, Philippines — Mga kanhi ALA Boys nga silang Kevin Jake 'KJ'  Cataraja, Jeo Santisima, Melvin 'El Gringo' Jerusalem ug Esneth 'Hard Hitter' Domingo parehong miiskor og knockout nga kadaogan sa ilang unang away ubos bag-ong handler Sanman Promotions/ZIP  sa "Vegeance" fight card niadtong Huwebes sa gabii didto sa Sanman Gym sa General Santos City.

Si WBO No. 1 super flyweight contender  Cataraja yano kaayong mikulit og daog pinaagi sa pagpaundang sud lang sa usa ka hugna ni John Mark Apolinario aron inaton ang iyang walay pildeng rekord ngadto sa 12-0 diin 10 sa mga biktima niini pulos gipaluhod. Mipakita sab og impresibong labok ang one-time world title challenger nga si Santisima, kinsa mipalukapa ni Marjun Piencenaves kaduha sa ikaduhang hugna sa wala pa undanga ang away sa maong round.

Wala sab magpaalkanse, ang WBC No. 2 minimumweight contender nga si Jerusalem mikulata ni Jason Francisco gikan sa pagsugod sa wala mipatugpa og mga body shots nga nakatumba sa kontra sa ikaduhang hugna.

Sa maong daog, si Santisima nagbitbit na og rekord nga 20-3,16KOs, samtang si Jerusalem adunay 16-2, 9KOs.

Si Domingo maoy mikompleto sa 4-0 sweep sa mga debutante sa Sanman human gipaundang si Gerald Alvarez sa ikaduha gihapon nga hugna. Nagbitbit na karon siya og 14-1, 8KOs.