TnT maglaum nga baskog sa sunod kampanya sa Philippine Cup

CEBU, Philippines — Maglaum ang TNT Tropang Giga nga mas maayo pa ug baskog sa sunod nilang kampanya sa PBA Philippine Cup.

Nagtuo si coach Bong Ravena nga ang injury nga nahiaguman sa duha niya ka mga alas usa sa gitumbok nga hinungdan nganong napilde ang Tropang Giga sa ilang PBA Philippine Cup bubble finals batok sa Barangay Ginebra Kings.

Ang Tropang Giga napilde sa “best-of-seven” series, 4-1, apil ang title clincher, 82-78 diin ang main man nga si Jayson Castro ug leading scorer Ray Park Jr. gibangko ug wala paduwaa tungod sa ilang injury.

“Hopefully we can give ourselves a chance next conference and stay healthy,” matud ni Ravena.

Si Parks nakaangkon og left calf injury sa unang duwa sa Finals ug wala na makaduwa’g balik sa nahibiling series, samtang si Castro nagsakit ang iyang tuhod sa sayong bahin sa third period sa Game-4 tungod sa bone spurs.

Sa bugtong niyang duwa sa Finals, si Parks miiskor og 20 puntos, upat ka rebounds ug upat ka assists sa ilang 94-100 nga kapildihan sa overtime. Sa iyang bahin, si Castro mi-average og 10.5 points, 2.7 rebounds ug team-best 5.7 assists sa upat ka duwa sa Finals. Mikompisal hinuon si Ravena nga lig-on ang Kings ug angayan kining koronahan isip kampiyon.

“No excuses. Ginebra deserved the championship,”  sumala pa ni Ravena.  “The positive thing is we made the Finals, And the negative side is we obviously lost.”